اسلام آباد(مانیٹرنگ ڈیسک)پاکپتن کے تھانہ کلیانہ کے ایس ایچ او انسپکٹر ارشد کی خاتون کیساتھ انڈین گانوں پر ڈانس اور اجے دیوگن کے ڈائیلاگ کی نقل کرتے ہوئے ویڈیو سوشل میڈیا پر وائرل، ڈی پی او پاکپتن ماریہ محمود کا نوٹس ، ایس ایچ او کو معطل کر کے محکمانہ انکوائری کا حکم دیدیا۔ تفصیلات کے مطابق پنجاب پولیس کے انسپکٹر ارشدایس ایچ او کلیانہ، ضلع پاکپتن تعینات تھےجن کی
دو ویڈیو ز سوشل میڈیا پر وائرل ہوئیں ہیں، پہلی ویڈیو میں وہ ہندی فلموں کے ولن بنے ہیں اوراجے دیوگن کے اسٹائل میں کہہ رہے ہیں کہ ’دو وقت کی روٹی کماتا ہوں، نماز پڑھتا ہوں، اس سے زیادہ میری ضرورت نہیں اور مجھے خریدنے کی تمہاری اوقات نہیں۔‘دوسری ویڈیو میں انسپکٹر ارشدایک خاتون کےساتھ انڈین گانے پر کسی منجھے ہوئے ڈانسٹر کی طرح رقص کرتے دکھائی دے رہے ہیں۔یہ معاملہ ڈی پی او پاکپتن ماریہ محمود کے نوٹس میں آیا تو انہوں نے فوری پولیس انسپکٹر ارشد کو معطلکردیا جبکہ ان کے خلاف محکمانہ انکوائری بھی شروع کردی گئی ہے۔ ان ویڈیو کے حوالے سے نجی ٹی وی سے بات کرتے ہوئے پولیس انسپکٹر ارشد کا کہنا ہے کہ دونوں ویڈیوز ان کے موبائل میں موجود تھیں جنہیں ان کے بھتیجے نےسوشل میڈیا پر اپ لوڈ کیا ہے۔ محکمہ کارروائی اور معطل ہونے کے حوالے سے انسپکٹر ارشد کا کہنا تھا کہ ڈی پی ماریہ محمود ایک سخت گیر خاتون آفیسر ہیں ، اللہ سے خیر کی امید ہے۔واضح رہے کہ اس سے قبل پنجاب پولیس کے متعدد افسران کے حوالے اسی قسم کی شکایات سامنے آچکی ہیں اور ان کی اس قسم کی قابل اعتراض حرکات میڈیا اور سوشل میڈیا کی زینت بن چکی ہیں۔تاہم اس حوالے سے تاحال یہ بات معلوم نہیں ہو سکی کہ ایس ایچ او ارشد کے ساتھ ویڈیو میں موجود خاتون کون ہے اور انسپکٹر ارشد کا اس سے کیا تعلق ہے۔
