راولپنڈی(این این آئی) پاک فوج کے ترجمان میجر جنرل آصف غفورنے پولیس کے پیشہ ورانہ صلاحیت کو سراہتے ہوئے کہا ہے کہ مشکل حالات سے گزرتے ہوئے پولیس سروس بہتر ہو چکی ہے،پولیس اور اس کے شہداء کو سلام پیش کرتے ہیں ۔ جمعہ کو سوشل میڈیا پر جاری بیان میں ڈی جی آئی ایس پی آر میجر جنرل آصف غفور نے کہا کہ مشکل حالات سے گزرتے ہوئے پولیس سروس بہتر ہو چکی ہے ۔

حالیہ عرصے میں انکی طرف سے پیشہ ورانہ صلاحیت کا مظاہرہ قابل ستائش ہے دہشتگردی کی کوششوں کو روکنے سے لے کر انہیں پہلے چیکنگ پوائنٹ پر ناکام بنانا اس کا ثبوت ہے ۔ ہم اپنے پولیس سروس کے شہداء کو سلام پیش کرتے ہیں ۔ دریں اثناء ڈی جی رینجرز سندھ میجر جنرل محمد سعید نے کہا ہے کہ کراچی کے چینی قونصل خانے پر حملہ کرنے والے دو دہشت گرد گیٹ کے اندر تھے ان کو وہیں پر مارا گیا۔چینی قونصل خانے پر حملے کے حوالے سے سندھ رینجرز کے ڈائریکٹر میجرجنرل محمد سعیدنے میڈیا سے گفتگو کرتے ہوئے بتایا کہ چینی قونصلیٹ پر حملے کے لیے تین دہشت گرد آئے تھے۔انہوں نے مزید بتایا کہ دو دہشت گرد گیٹ کے اندر ہی تھے ان کو وہیں پر مار دیا گیا تھا،اب صورت حال قابو میں ہے۔ڈی جی رینجرز محمد سعید نے یہ بھی کہا کہ واقعے میں چینی قونصلیٹ کے عملے کو کوئی خراش تک نہیں آئی۔واضح رہے کہ جمعہ کی صبح کراچی میں چینی قونصل خانے پر دہشت گروں کے حملے کے نتیجے میں 2پولیس اہلکار شہید اور سیکیورٹی گارڈ شدید زخمی ہوا ہے۔پولیس اور رینجرز کی جوابی کارروائی کے نتیجے میں 3دہشت گرد ہلاک ہوئے ہیں جن کے قبضے سے خود کش جیکٹس، اسلحہ اور گولہ بارود برآمد ہوا ہے۔  پاک فوج کے ترجمان میجر جنرل آصف غفورنے پولیس کے پیشہ ورانہ صلاحیت کو سراہتے ہوئے کہا ہے کہ مشکل حالات سے گزرتے ہوئے پولیس سروس بہتر ہو چکی ہے،پولیس اور اس کے شہداء کو سلام پیش کرتے ہیں ۔