لاہور (ا ین این آئی) احتساب عدالت نے 11ارب روپے کے ایم این ایم موٹر سائیکل فراڈ کیس میں ملزم اعجاز احمد کی 8لاکھ 80ہزار روپے کی پلی بارگین کی درخواست منظور کر لی ۔ احتساب عدالت کے جج منیر احمد نے سماعت کی ۔نیب پراسیکیوٹر نے بتایا کہ ملزم اعجاز احمدپر مرکزی ملزم احمد سیال کی معاونت سے عوام سے کروڑوں روپے کی لوٹ مار کا الزام ہے،سہیل سمیت دیگرملزمان خطیر منافع کے لالچ پر عوام سے رقوم بٹورتے رہے،

ملزمان کیجانب سے نئے کسٹمرز سے وصول رقوم میں سے ہی رقوم پرانے کسٹمرز کو بطور منافع دی جاتی رہی،مذکورہ کیس میں مجموعی طور پر 43 ملزمان کی گرفتاری عمل میں لائی جا چکی ہے،ملزمان نے عوام سے دھوکہ دہی اورمنافع کا لالچ دیتے ہوئے لگ بھگ 11 ارب روپے لوٹے۔احتساب عدالت نے ملزم اعجاز احمد کی 8لاکھ 80ہزار روپے کی پلی بارگین کی درخواست منظور کرلی اورملزم اعجاز احمد کو رہا کرنے کا حکم دے دیا۔