لاہور(نیوز ڈیسک) وفاقی حکومت نے (ن) لیگی حکومت کے دورحکومت میں شروع ہونے والے ایڈوانسڈ میٹرنگ انفراسٹرکچر پر عملدرآمد شروع کرنیکا فیصلہ کر لیا‘ تیس ارب روپے کی لاگت سے لیسکو میں تین سال تک منصوبے کو پایہ تکمیل تک پہنچایا جائیگا۔ذرائع کے مطابق سابق دور حکومت میں وزارت پاور ڈویژن نے وسیع پیمانے پر ہونے والی بجلی چوری اور اووربلنگ کی روک تھام کے لئے ایڈوانسڈ میٹرنگ انفراسٹرکچر کے نام سے میگا پراجیکٹ بنایا ، پلاننگ کمیشن کی منظوری کے بعد
پراجیکٹ پر کام شروع نہ ہو سکا، تاہم موجودہ حکومت نے ایک بار پھر اسی پراجیکٹ پر کام شروع کر دیا ہے لیسکو چیف مجاہد پرویز چٹھہ نے کہا ہے کہ تین سال کے دوران کمپنی میں منصوبے کو آپریشنل کرنے کی کوشش کی جائیگی۔ میگا پراجیکٹ کے ذریعے صارفین کے میٹرز کی مسلسل مانیٹرنگ کی جا سکے گی، کنٹرول روم کی مدد سے کنکشن منقطع بھی کیا جا سکے گا۔ لیسکو کے ابتدائی طور پر ناردرن، سینٹرل اور ساتھ سرکل میں میٹر کی تنصیب کی جائیگی۔
