کینبرا (این این آئی)آسٹریلیا کی پولیس نے کہاہے کہ انہوں نے اسٹرابیری میں چھپی ہوئی سوئیوں کے واقعات کی تحقیقات کے بعد ایک 50 سالہ خاتون کو گرفتار کرلیا ہے۔غیرملکی خبررساں ادارے کے مطابق کوئینز لینڈ پولیس سروس نے اپنے بیان میں کہا کہ کوئنزلینڈ میں مبینہ طور پر اسٹرابیری میں سوئیاں چھپانے کے الزام میں ایک 50 سالہ خاتون کو حراست میں لے لیا گیا۔گرفتار شدہ خاتون کو برسبین مجسٹریٹ کورٹ میں

پیش کیا جائے گا۔مذکورہ گرفتاری ملک بھر میں اسٹرابیری میں چھپی ہوئی سوئیوں کے کم از کم 100 مقدمات درج ہونے کے بعد عمل میں آئی۔آسٹریلیا کی 6 ریاستوں میں کم از کم 6 مختلف برانڈز میں چھپی ہوئی سوئیاں برآمد ہوئی تھیں۔اس کے علاوہ دیگر پھلوں کیلے،سیب اور آم میں دھات کے ٹکڑے ملنے کے چند واقعات سامنے آئے تھے جس سے متعلق کہا گیا تھا کہ تحقیقات کا رخ موڑنے کے لیے یا مذاق میں ایسا کیا گیا ۔