کھٹمنڈو (نیوزڈیسک)نیپال میں امدادی سرگرمیوں کے دوران گذشتہ ہفتے گر کر تباہ ہونے والے امریکی فوجی ہیلی کاپٹر پر سوار تمام آٹھ لوگوں کی لاشیں نکال لی گئی ہیں۔ میڈیا رپورٹ کے مطابق گر کر تباہ ہونے والے ہیلی کاپٹر کا ملبہ جمعہ کو ملا تھا.حادثے کی وجوہات معلوم کرنے کےلئے تحقیقات جاری ہیں۔گذشتہ منگل کو چینی سرحد کے قریب امداد پہنچاتے ہوئے گر کر تباہ ہونے والے ہیلی کاپٹر میں چھ امریکی اور دو نیپالی فوجی سوار تھے۔واضح رہے کہ نیپال میں 25 اپریل کو 7.8 شدت کا زلزلہ آیا تھا جس کے نتیجے میں آٹھ ہزار سے زیادہ افراد ہلاک ہوئے تھے جس کے بعد وہاں امدادی کارروائیاں کی جا رہی تھیں۔ہیلی کاپٹر ایک مقام پر امدادی اشیا پہنچانے کے بعد دوسرے مقام کی جانب جا رہا تھا جب نیپال میں دوسرا زلزلہ آیاجس کے بعد ان سے رابطہ کرنے کی کوشش کی گئی تو معلوم ہوا کہ ہیلی کاپٹر لاپتہ ہو چکا ہے۔پینٹاگون کے ترجمان سٹیو وارین کے مطابق ابھی تک ہیلی کاپٹر کے گرنے کی وجہ تو معلوم نہیں ہو سکی ہے تاہم وہاں قریب ہی موجود بھارتی ہیلی کاپٹر نے ریڈیو پر کچھ باتیں سنی تھیں جن سے معلوم ہوتا ہے کہ شاید ایندھن کا کوئی مسئلہ تھانیپال ٹائمز کے مدیر کنڈا ڈکشٹ نے بتایا کہ ہیلی کاپٹر کا ملبہ کھٹمنڈو سے 56 کلو میٹر دور ایک گھنے جنگل میں ملا ہے تین سو امریکی فوجیوں نے نیپال میں امدادی سرگرمیوں میں حصہ لیا جس کے لیے انھوں نے مختلف طیاروں کا بھی استعمال کیا۔