جہلم (این این آئی) وفاقی وزیر اطلاعات ونشریات چوہدری فواد حسین نے کہا ہے کہ کوئی این آر اوکی توقع نہ رکھے ٗ پی ٹی آئی چوروں اور ڈاکوؤں کو الٹا لٹکانے کا وعدہ پورا کرے گی ٗ وزیراعظم عمران خان پاکستان کیلئے قرضہ لیں گے اپنے بچوں کیلئے نہیں ٗ یوم سیاہ کو متنازعہ بنانے کیلئے کسی اسرائیلی کی پاکستان آمد کا شوشہ چھوڑا گیا ٗ سی اے اے نے کسی بھی اسرائیلی جہاز کی اسلام آباد آمد کی تردید کی ہے۔
ہفتہ کو وزیر اطلاعات چودھری فواد حسین نے تقریب سے خطاب کرتے ہوئے کہا کہ آج کے دن بھارت نے کشمیریوں کو غلام بنانے کی مذموم کوشش کی ٗپاکستان سمیت دنیا بھر میں مقیم کشمیری آج یوم سیاہ منا رہے ہیں ٗ یوم سیاہ ہمیشہ جاری نہیں رہے گا ٗ انشاء اللہ کشمیر جلد بھارت سے آزادی لے گا ۔ انہوں نے کہاکہ کشمیر کے عوام کے حق آزادی کیلئے ہمیشہ ساتھ کھڑے رہیں گے۔وزیر اطلاعات و نشریات نے کہاکہ یوم سیاہ کو متنازعہ بنانے کیلئے کسی اسرائیلی کی پاکستان آمد کا شوشہ چھوڑا گیا ٗپاکستان کی حکومت اور فوج کو متازعہ بنانے کی کوشش کی گئی ٗاسرائیل کے صحافی کے ٹویٹ کے ذریعے پروپیگنڈا کیا گیا۔ انہوں نے کہاکہ سی اے اے نے کسی بھی اسرائیلی جہاز کی اسلام آباد آمد کی تردید کی ہے ۔ انہوں نے کہاکہ اپوزیشن کے پاس لیڈر شپ اور نظریہ نام کی کوئی چیز نہیں۔چودھری فواد حسین نے کہاکہ فضل الرحمان ، آصف زرداری اور نواز شریف کی سیاست ڈوب رہی ہے۔وزیر اطلاعات نے کہاکہ اپوزیشن کی سیاست صرف بدعاؤں تک محدود ہو گئی ہے ٗ1990سے مولانا فضل الرحمان کشمیر کمیٹی کے چیئرمین چلے آرہے ہیں۔ انہوں نے کہاکہ مولانا فضل الرحمان نے بطور چیئرمین کشمیر کمیٹی آج تک کوئی بیان نہیں دیا۔ انہوں نے کہاکہ پی ٹی آئی چوروں اور ڈاکوؤں کو الٹا لٹکانے کا وعدہ پورا کرے گی۔وزیر اطلاعات نے کہا کہ عوام نے تحریک انصاف کو احتساب کیلئے ووٹ دیا ہے ٗوزیراعظم نے اپنے پہلے خطاب میں مدینہ کی ریاست کا ماڈل اپنانے کا وعدہ کیا ۔
انہوں نے کہاکہ 1971میں پاکستان کا کل قرض 31ارب روپے تھا ٗپرویز مشرف کے دور میں پاکستان کا کل قرض 6ہزار ارب تھا۔وزیر اطلاعات نے کہا کہ نواز شریف اور زرداری کے دور میں ملکی قرضوں میں 24ہزار ارب کا اضافہ ہوا ٗان کے ڈرائیورز اور فالودے والے کے اکاؤنٹس سے کروڑوں روپے نکل رہے ہیں ۔ انہوں نے کہاکہ وزیراعظم عمران خان پاکستان کیلئے قرضہ لیں گے اپنے بچوں کیلئے نہیں۔ انہوں نے کہا کہ حساب دینا پڑے گا، اگر حساب کتاب نہیں ہوا تو ملک کا نقصان ہو گا ٗکسی کو این آر او نہیں ملے گا ، کوئی اس کی توقع نہ رکھے۔
