لاہور ( این این آئی) احتساب عدالت نے سابق وزیر اعلیٰ پنجاب محمد شہباز شریف کے داماد علی عمران یوسف کی جائیداد کی تفصیلات کی رپورٹ جمع کروانے کا حکم دیتے ہوئے سماعت ملتوی کر دی ۔گزشتہ روز لاہور کی احتساب عدالت میں سابق وزیراعلیٰ شہبازشریف کے داماد عمران علی کی جائیداد ضبط کرنے کے کیس کی سماعت ہوئی۔
عدالت نے علی عمران کی جائیداد قرق کرنے کا حکم دیتے ہوئے جائیداد کی تفصیلی رپورٹ پیش کرنے کا حکم دیا تھا ۔تاہم قومی احتساب بیورو (نیب ) کی جانب سے عمران علی کی جائیداد کی تفصیلی رپورٹ عدالت میں جمع نہیں کرائی گئی۔جس پر عدالت نے نیب کو آئندہ سماعت پر عمران علی کی جائیداد کی تفصیلی رپورٹ پیش کرنے حکم دیتے ہوئے سماعت ملتوی کر دی ۔نیب پراسیکیوٹر کی جانب سے عدالت کو بتایا گیا تھا کہ عمران علی کے علی سینٹر، علی ٹاؤن میں کروڑوں روپے مالیت کے دفاتر اور اپارٹمنٹ ہیں، علی اینڈ فاطمہ ڈویلپر کے نام پر گلبرگ میں اربوں روپے مالیت کا پلازہ ہے، گلبرگ 3 میں کروڑوں روپے مالیت کا پلاٹ ہے، غوث الاعظم ڈویلپرز کے نام پر بھی کروڑوں روپے کی جائیداد عمران علی کے نام ہے۔نیب پراسیکیوٹر نے مزید بتایا کہ مدینہ فیڈز مل اور علی پروسیسڈ فوڈز پرائیویٹ لمیٹڈ بھی عمران علی کی ملکیت ہے۔نیب پراسیکیوٹر نے کہاکہ عمران علی پر پنجاب پاور ڈویلپمنٹ کمپنی کے چیف فنانشل آفیسر سے 13 کروڑ روپے رشوت لینے کا الزام ہے، انہیں نیب میں طلب کیا گیا لیکن وہ پیش نہیں ہوئے، عمران علی کے وارنٹ گرفتاری جاری ہوئے تاہم ملزم بیرون ملک فرارہو ہوچکا ہے۔ احتساب عدالت نے سابق وزیر اعلیٰ پنجاب محمد شہباز شریف کے داماد علی عمران یوسف کی جائیداد کی تفصیلات کی رپورٹ جمع کروانے کا حکم دیتے ہوئے سماعت ملتوی کر دی ۔
