لاہور(این این آئی)بجلی کی قیمتوں میں 3.68پیسے فی یونٹ اضافے سے مہنگائی کا سونامی آئے گا ،آئی ایم ایف سے قرض کے حصول کے بعد اس کے مطالبات کو پورا کرنے کیلئے عوام پر مہنگائی کے مزید بم گرانے کی تیاریاں جاری ہیں ،حکومت عوام کو مستقبل میں آسودگی

لانے کی طفل تسلیاں دینے کی بجائے ریلیف دینے کیلئے اقدامات کرے ۔ ان خیالات کااظہارمسلم لیگ (ن) تاجر ونگ کے رہنماؤں میاں عثمان اور چوہدری عامر صدیق نے مختلف مارکیٹوں کے تاجروں کے وفد سے ملاقات میں گفتگو کرتے ہوئے کیا ۔ انہوں نے کہا کہ پی ٹی آئی کے سونامی نے عوام کو مہنگائی کی لپیٹ میں لے رکھا ہے جس کی وجہ سے زندگی گزارنا محال ہو گیا ہے ۔ بجلی کے نرخوں کے نئے سلیب جاری ہونے کے بعد عوام سمیت تمام شعبوں کیلئے بجلی مہنگی کر دی گئی ہے جس سے ہر طبقہ پریشان ہے ۔ حکومت سے مطالبہ ہے کہ بجلی کی قیمتوں میں اضافے کو فی الفور واپس لیا جائے اور قیمتو ں کو دو ماہ قبل کی سطح پر واپس لایا جائے ۔ انہوں نے کہا کہ گزشتہ دو ادوار میں اتنی مہنگائی نہیں ہوئی جتنی موجودہ حکومت نے صرف دو ماہ کے عرصے میں کر دی ہے ۔ آئی ایم ایف سے قرض کے حصول کے بعدمہنگائی کی شرح میں مزید 40فیصد تک اضافے کا امکان ہے جس سے غریب آدمی زندہ درگورہو جائے گا۔