کراچی(وائس آف ایشیا)نیب نے کرپشن کے خلاف کارروائیوں کا آغاز کر رکھا ہے اور انہی تحقیقات کی روشنی میں کئی اہم اور بڑی شخصیات کی گرفتاریوں کا بھی امکان ظاہر کیا جا رہا ہے۔سابق صدر آصف علی زرداری کے خلاف بھی سپریم کورٹ میں 35 ارب روپے کی منی لانڈرنگ کیس زیر سماعت ہے، کیس حتمی مراحل میں داخل ہونے کے ساتھ ہی سابق صدر آصف علی زرداری کو بھی اپنی جان کے لالے پڑ گئے ہیں۔
انہوں نے گرفتاری سے بچنے کے لیے وکلا سے مشاورت کا آغاز بھی کر دیا ہے۔تفصیلات کے مطابق سپریم کورٹ میں 35 ارب روپے کے مبینہ جعلی اکاؤنٹس کے ذریعے منی لانڈرنگ سے متعلق کیس کی جاری سماعت اور آصف علی زرداری کے گرد گھیرا تنگ ہونے پر آصف علی زرداری سینئر وکلا سے مشاورت کر رہے ہیں۔ذرائع کے مطابق سابق صدر آصف علی زرداری کو جعلی بنک اکاؤنٹس کے علاوہ این آر او کیس کی بھی قانونی پیچیدگیوں کا اندازہ ہے، جعلی بنک اکاؤنٹس کیس میں سپریم کورٹ کی جانب سے قائم کی گئی ایف آئی اے اور دیگر محکموں کے اعلیٰ افسران پر مشتمل جے آئی ٹی نے معاملے پر کئی بڑی پیش رفت کی ہیں اور تحقیقات کے نتیجے میں مقدمے میں نامزد ملزمان کے لیے مشکلات بڑھتی جا رہی ہیں۔جعلی بنک اکاؤنٹس کیس میں سابق صدر آصف علی زرداری اور ان کی ہمشیرہ فریال تالپور کا نام آنے کے بعد دونوں نے اپنے اوپر عائد کیے جانے والے تمام الزمات کو جھوٹا اور بے بنیاد قرار دیا تھا اور سپریم کورٹ میں پیش ہونے سے بھی انکار کر دیا تھا۔ جس پر عدالت نے کیس کی تحقیقات کے لیے جوائنٹ انوسٹی گیشن ٹیم تشکیل دی اور انہیں جے آئی ٹی سے تعاون کرنے کی ہدایت کی۔ سابق صدر آصف علی زرداری نے بیرسٹر اعتزاز احسن ، سردار لطیف کھوسہ اور فاروق ایچ نائیک سے مقدمے سے متعلق مشاورت کی ہے اور آئندہ کی قانونی حکمت عملی پر تبادلہ خیال کیا ہے۔ دوسری جانب قانونی ماہرین کا کہنا ہے کہ جعلی بنک اکاؤنٹس میں سابق صدر آصف علی زرداری کی گرفتاری کے امکان سے انکار نہیں کیا جا سکتا۔
