پنڈی گھیب ( آئی این پی ) ڈسٹرکٹ پولیس آفیسر اٹک حسن اسد علوی کی ہدایات پر پولیس نے بچوں سے زیادتی کرکے فلمیں بناکر انٹر نیٹ پر وائرل کرنے والے تین رکنی گروہ کو گرفتار کرلیا، ملزمان سے موبائل فون برآمد ۔ پولیس رپورٹ کے مطابق بچوں کے ساتھ زیادتی کرکے ان کی ویڈیو انٹر نیٹ پر وائرل ہونے پر ڈی پی او اٹک حسن اسد علوی نے فوری طور پر نوٹس لیتے ہوئے واقعہ میں ملوث ملزمان کو گرفتار کرنے کا حکم دیا جس پر تھانہ بسال کے ایس ایچ او سب انسپکٹر عابد قریشی نے
ملزمان کو ٹریس کرکے عملہ کے ہمراہ کامیاب چھاپہ مار کر تین ملزمان محمد اویس، حارث ریاض اور نوید اختر کو گرفتار کرکے ویڈیو اور انٹر نیٹ میں استعمال ہونے والا موبائل بر آمد کرلیا اس موقع پر ڈی پی او حسن اسد علوی نے میڈیا سے بات چیت کرتے ہوئے کہا کہ معصوم بچوں کو ورغلا کر زیادتی کا نشانہ بنانے والے درندے کسی رعایت کے مستحق نہیں ہیں پولیس ان درندہ صفت عناصر کو کیفر کردار تک پہنچائے گی اور چائلڈ پورنو گرافی کے مرتکب ملزمان کو قانون کے تحت سزا دی جائے گی۔
