لاہور( این این آئی )پنجاب حکومت نے راولپنڈی اور اسلام آباد کو صاف پانی کی فراہمی کیلئے رواں مالی سال میں ڈاڈھوچہ ڈیم (dadhocha dam) کی تعمیر شروع کرنے کا اعلان کیا ہے ۔ صوبائی وزیر خزانہ مخدوم ہاشم جواں بخت نے بجٹ تقریر میں بتایا کہ رواں مالی سال میں اس کی تعمیر شروع کی جائے گی جوکہ راولپنڈی اور اسلام آباد کو صاف پینے کا پانی فراہم کرے گا اور

اس کیلئے 6ارب روپے کا تخمینہ لگایا گیا ہے ۔پنجند بیراج کی بحالی اور جلال پور کینال سسٹم کی تعمیر کا آغاز بھی رواں سال شروع کیا جائے گا جس سے ضلع بہاولپور اور رحیم یار خان کے 1.6ملین رقبے کو پانی کی یقینی فراہمی اور ضلع جہلم اور خوشاب کے ایک لاکھ ساٹھ ہزار نئے رقبے کو آبپاشی کی سہولت میسر ہوگی ۔ پنجاب حکومت کی جانب سے شمالی ، جنوبی اور وسطی پنجاب میں تین نئی اعلیٰ معیار کی یونیورسٹیاں بنانے کا فیصلہ کیا گیا ہے ۔ صوبائی وزیر خزانہ مخدوم ہاشم جواں بخت نے پنجاب اسمبلی کے ایوان میں بجٹ پیش کرتے ہوئے کہا کہ آج کے دور میں قوموں کی ترقی میں بین الاقوامی معیار کی یونیورسٹیاں ہی بنیادی کردار ادا کرتی ہیں لیکن صوبہ پنجاب میں بدقسمتی سے بین الاقوامی معیار کی یونیورسٹیوں کا فقدان ہے اس بات کو مد نظررکھتے ہوئے موجودہ مالی سال میں شمالی ، جنوبی اور وسطی پنجاب میں تین نئی اعلیٰ معیارکی یونیورسٹیوں کی فزیبلٹی سٹڈی کروائی جارہی ہے ۔انہوں نے بتایا کہ کالجز کے معیار کو بہتربنانے کیلئے ماڈل کالجز بنائے جارہے ہیں جس کے بعد مرحلہ وار جامع پالیسی کے تحت تمام کالجز کو ماڈل کالجز میں تبدیل کردیاجائے گا ۔