لاہور(مانیٹرنگ ڈیسک) ملک بھر میں ضمنی انتخابات کا عمل زور شور سے جاری ہے ۔ تازہ ترین اطلاعات کے مطابق ن لیگی رہنما سعد رفیق نے الزام عائد کیا ہے کہ ان کے کارکنوں کو گرفتار کیا جارہا ہے ۔ قومی اسمبلی کے حلقہ این اے131میں اس وقت پولنگ کا عمل جاری ہے ۔ جس میں ن لیگ کے رہنما سعد رفیق جبکہ تحریک انصاف کے رہنما ہمایوں اختر خان کے درمیان تگڑا مقابلہ جاری ہے ۔

مسلم لیگ (ن) کے مرکزی رہنما سابق وفاقی وزیر و حلقہ این اے 131 سے امیدوار خواجہ سعد رفیق نے الیکشن کمیشن پر تحفظات کا اظہار کرتے ہوئے کہا کہ اس بار انتخابی نتائج کو کل تک برداشت نہیں کیا جائے گا، ہم نے دھاندلی روکنے کیلئے اپنے پولنگ ایجنٹ کی اچھی طرح تربیت کی ہے،سیاسی انتظام پر لوگ آج اپنا رد عمل دیں گے۔تفصیلات کے مطابق قومی اسمبلی کے حلقہ این اے 131میں لیگی امیدوار خواجہ سعد رفیق نے گرلز ہائی اسکول ڈیفنس میں اپنا ووٹ کاسٹ کیا۔بعد ازاں میڈیا سے گفتگو کرتے ہوئے خواجہ سعد رفیق نے ضمنی انتخابات پر تحفظات کا اظہار کرتے ہوئے کہا کہ مسلم لیگ (ن) کو انتخابی مہم کے دوران شدید مشکلات کا سامنا رہا،کارکنوں کی پکڑ دھکڑ کے ساتھ ساتھ میری اور خواجہ سلمان رفیق کی گرفتاری کی افواہ پھیلائی گئی، تمام ہتھکنڈوں کے باعث سیاسی انتقام پر عوام آج اپنا فیصلہ سنائے گی۔خواجہ سعد رفیق نے کہا کہ الیکشن کمیشن کے عملے میں تربیت کا فقدان ہے، مگر ہم نے مبینہ دھاندلی کی روک تھام کے لیے اپنے پولنگ ایجنٹس کو چوکنا رکھا ہوا ہے، اس بار انتخابی نتائج میں تاخیر برداشت نہیں کریں گے۔ سابق وفاقی وزیر کا کہنا تھا کہ (ن) لیگ گرفتاریوں سے ڈرنے والے نہیں ہے، نیب کی جانب سے پاسپورٹ منسوخ کرنا سمجھ سے بالا تر ہے، ہم کہیں نہیں بھاگ رہے،جس نے پکڑنا ہے اپنا شوق پورا کرلے، کیونکہ زیادتی کا بدلہ اب عوام ہی چکائینگے، اور رزلٹ آنے کے بعد سب کو پتہ چل جائے گا۔