لاہور(آئی این پی ) انسداد دہشت گردی عدالت نے سانحہ ماڈل ٹا ئو ن استغاثہ کیس کی سماعت کے دوران سابق آئی جی پنجاب مشتاق سکھیرا پر فرد جرم عائد کردی۔ منگل کو انسداد دہشت گردی عدالت میں سانحہ ماڈل ٹان استغاثہ کیس کی سماعت ہوئی، جہاں سابق آئی جی پنجاب مشتاق سکھیرا پیش ہوئے۔سماعت کے دوران عدالت نے سابق آئی جی پر فرد جرم عائد کردی، تاہم مشتاق سکھیرا نے عدالت میں صحت جرم سے
انکار کیا۔ عدالت نے سابق آئی جی کو فرد جرم پر دستخط کرنے کا حکم دیا تو مشتاق سیکھرا نے فرد جرم پر دستخط کرنے سے انکار کر دیا۔ عدالت نے ریمارکس دیتے ہوئے کہا کہ آپ فرد جرم پڑھ کر سائن کریں ،ورنہ عدالت اپنا حکم جاری کرے گی۔ عدالتی حکم کے بعد مشتاق سکھرا نے فرد جرم پر دستخط کر دیئے۔بعدازاں عدالت نے کیس کی سماعت(آج) بدھ تک ملتوی کرتے ہوئے گواہان کو شہادتوں کے لیے طلب کرلیا۔
