کراچی (این این آئی) پاکستانی طلبہ کو اعلی تعلیم کے مواقع فراہم کرنے کے لیے 33 امریکی یونیورسٹیوں کے وفود رواں ہفتے کراچی آئے جہاں 7 اور 8 اکتوبر کو پاکستان میں بہت بڑا یو ایس کالج فیئر منعقد کیا گیا۔ تیرھویں دوسالہ ساتھ ایشیا ٹور کے ذریعے سندھ بھر کے ہزاروں طلبہ، ان کے والدین، کونسلروں اور مقامی یونیورسٹیوں کے عہدے داروں کو امریکا میں تعلیم کے وسیع مواقع سے آگاہی اور تعلیمی اداروں میں داخلوں کی

براہ راست رہنمائی میسر آئی۔کراچی میں امریکی قونصل جنرل جو این ویگنر نے شرکا سے خطاب کرتے ہوئے کہا کہ ہمیں خوشی ہے کہ مقامی طلبہ کو امریکی جامعات میں داخلوں کا موقع فراہم کرنے کے لیے 25 سے زائد یونیورسٹیوں کے نمائندے یہاں آئے ہیں۔ یہ حالیہ برسوں میں پاکستان کا دورہ کرنے والی یونیورسٹیوں کی سب سے بڑی تعداد ہے۔ یہ اس بات کو ظاہر کرتی ہے کہ ہمارے تعلیمی ادارے یہ ادراک رکھتے ہیں کہ پاکستانی طلبہ کتنے ذہین ہیں اور یہ امریکی اعلی تعلیمی اداروں میں مختلف النوع مواقع کی بھی عکاس ہیں۔ آپ کی دلچسپی کا شعبہ کوئی بھی ہو آپ امریکا کی ہزاروں یونیورسٹیوں اور کالجوں میں اپنی پسند کے شعبے کا انتخاب کرسکتے ہیں۔اس بار یونائیٹڈ اسٹیٹس ایجوکیشنل فانڈیشن ان پاکستان کے تحت ایجوکیشن یو ایس اے نمائش میں پہلی بار اتنی بڑی تعداد میں امریکی یونیورسٹیوں کے وفود آئے ہیں جو پاکستانی اسکولوں اور یونیورسٹیوں کا دورہ کررہے ہیں۔ ان 25 یونیورسٹیوں میں سے 17 پہلی بار پاکستان آئی ہیں۔ نمائش میں اوہائیو یونیورسٹی، بوائس اسٹیٹ یونیورسٹی، کولبی- سیویر یونیورسٹی، نیویارک انسٹی ٹیوٹ آف ٹیکنالوجی، کینٹ اسٹیٹ یونیورسٹی، لوزیانا ٹیک یونیورسٹی، یونیورسٹی آف الی نوائے- شکاگو، مون ماتھ یونیورسٹی، انڈیانا یونیورسٹی، پرڈیو یونیورسٹی انڈیانا پولس، دی یونیورسٹی آف ٹیکساس آرلنگٹن- کالج آف انجینیئرنگ، اسٹیٹ یونیورسٹی آف نیویارک ایٹ فریڈونیا ، مشی گن اسٹیٹ یونیورسٹی، فلوریڈا انٹرنیشنل یونیورسٹی، پٹس برگ اسٹیٹ یونیورسٹی، آگسٹانا یونیورسٹی، کو کالج اور فورڈھم یونیورسٹی کے نمائندے شامل ہیں۔