اسلام آباد(مانیٹرنگ ڈیسک)اڈیالہ جیل سے رہائی کے بعد نواز شریف آج سیاسی سرگرمیوں کا آغاز کریں گے۔ نجی ٹی وی کے مطابق آج جاتی امرا میں نوازشریف سے پارٹی رہنماؤں کی ملاقات متوقع ہے جس میں مستقبل کی سیاسی حکمت عملی پر مشاورت ہوگی ۔پارٹی رہنماؤں سے ملاقات کے دوران ضمنی انتخاب کی مہم میں مریم نواز کو متحرک کرنے کا فیصلہ بھی کیا جائے گا۔معتبر ذرائع کے مطابق مریم نواز نے جیل سے باہر آتے ہی پارلیمانی
سیاست میں قدم رکھنے کا فیصلہ کر لیا ہے۔ مریم نواز لاہور کے حلقہ این اے 127 سے ضمنی الیکشن میں حصہ لیں گی۔ این اے 127 سے مسلم لیگ ن کے کامیاب لیکن کورنگ اُمیدوار علی پرویز اپنی نشست سے استعفیٰ دیں گے جس کے بعد مریم نواز اس حلقے سے الیکشن میں حصہ لیں گی۔دریں اثنا آج عوامی نیشنل پارٹی کے وفد نے اسفند یار ولی کی قیادت میں نوازشریف سے ملاقات کی اور کلثوم نواز کے انتقال پر اظہار تعزیت کیا ہے۔
