اسلام آباد(مانیٹرنگ ڈیسک)ایپل کی جانب سے نئے آئی فونز کو بدھ (12 ستمبر) کو متعارف کرایا جارہا ہے، جن کی بیشتر تفصیلات پہلے ہی لیک ہوکر سامنے آچکی ہیں۔ اگر آپ بھی نئے آئی فونز کے منتظر ہیں تو یہاں جان سکتے ہیں کہ یہ نئی ڈیوائسز کیسی ہوں گی۔ 3 نئے آئی فونز متعدد رپورٹس میں یہ بات سامنے آئی ہے کہ ایپل کی جانب سے گزشتہ سال کی طرح اس بار بھی 3 آئی فونز متعارف کرائے جائیں گے۔

ان میں 2 فلیگ شپ ماڈلز ہوں گے جنھیں آئی فون ایکس ایس اور ایکس ایس میکس یا پلس کہا جائے گا جبکہ ایک سستا آئی فون ایکس سی یا آر ہوگا جس کی قیمت آئی فون 8 جتنی ہوگی۔ سب کے ڈیزائن آئی فون ایکس جیسے ہوں گے 5.8 انچ کا آئی فون ایکس ایس تو ہو بہو گزشتہ سال کے آئی فون ایکس جیسا ہوگا تاہم اس میں زیادہ تیز چپ اور پہلے سے بہتر کیمرہ دیا جائے گا، جبکہ ڈسپلے او ایل ای ڈی اسکرین پر مشتمل ہوگا، جبکہ فیس آئی ڈی سے فون ان لاک کیا جاسکے گا، اس کے مقابلے میں آئی فون ایکس ایس میکس یا پلس 6.5 انچ کے بڑے ڈسپلے کے ساتھ ہوگا، تاہم باقی فیچرز آئی فون ایکس ایس جیسے ہی ہوں گے، آئی فون ایکس سی یا آر 6.1 انچ کے ایل سی ڈی ڈسپلے کے ساتھ ہوگا، جبکہ بیک پر سنگل کیمرہ دیا جائے گا۔ سب سے بڑی تبدیلی اس بار چونکہ ڈیزائن تو گزشتہ سال جیسا ہی ہوگا تو اس بار سب سے زیادہ بڑی تبدیلی چپس کی ہوگی جس کی مدد سے ایپل نئے آئی فونز کے گزشتہ سال کے ماڈلز کے مقابلے زیادہ بہتر بنائے گا، آئی فون ایکس ایس اور اس کا بڑا ماڈل اگیومینٹڈ رئیلٹی ٹیکنالوجی کے ساتھ پہلے سے بہتر ڈوئل کیمرہ سیٹ اپ سے لیس ہوں گے۔ سستا آئی فون کیسا ہوگا؟ آئی فون ایکس سی یا آر متعدد رنگوں میں دستیاب ہوگا، جس کی ایل سی ڈی اسکرین میں فیس آئی ڈی کا فیچر فون ان لاک کے لیے ہوگا یعنی اس بار ایپل فنگرپرنٹ ریڈر کو مکمل طور پر ختم کردے گی۔ قیمت کیا ہوگی؟ ان آئی فونز کی قیمتوں کے بارے میں کچھ یقین سے کہنا تو مشکل ہے کیونکہ اس کا اعلان تو ایپل کے ایونٹ میں ہی ہوگا، تاہم کہا جارہا ہے کہ اس بار کمپنی گزشتہ سال کی قیمتوں کو برقرار رکھے گی۔ یعنی گزشتہ سال کا آئی فون ایکس اگر 999 سے 1149 ڈالرز میں فروخت کیا جارہا تھا تو اس بار آئی فون ایکس ایس میکس کی قیمت 1100 ڈالرز سے شروع ہوگی جبکہ آئی فون ایکس سی یا آر 699 ڈالرز میں متعارف کرایا جاسکتا ہے۔