کراچی(سی پی پی)پاکستان پیپلز پارٹی کی رہنما اور سابق ڈپٹی اسپیکر سندھ اسمبلی شہلا رضا نے تنقید کا سبب بننے والے ٹوئٹ پر معافی مانگ لی۔سماجی رابطے کی ویب سائٹ ٹوئٹر پر شہلا رضا نے ایک پوسٹ شیئر کیا ہے جس میں ان کاکہنا ہے کہ انہوں نے انتخابات کے دوران ایک

سوشل میڈیا ٹیم تشکیل دی تھی جو ان کا ٹوئٹر اکاؤنٹ چلا رہی تھی۔ اس دوران ٹیم کے ہی ایک ممبر نے ان کے ٹوئٹر ہینڈل سے کچھ غیرمناسب ٹوئٹ کیے جو کہ لوگوں میں انتشار کا باعث بنے۔ شہلا رضا نے ٹوئٹ میں مزید لکھا کہ انہوں نے اپنی سوشل میڈیا ٹیم ختم کردی ہے اور اب وہ اپنا ٹوئٹر اکاؤنٹ خود چلائیں گی جبکہ وہ کابینہ اجلاس میں مصروفیت کے باعث ان باتوں سے بے خبر رہیں۔ آخر میں انہوں نے لکھا کی ان کی معافی قبول کی جائے۔سابق ڈپٹی اسپیکر شہلا رضانے اپنے ٹوئٹر اکاؤنٹ پر ایک اور پوسٹ جاری کیا ہے جس میں ان کا کہنا ہے کہ ان کے نام سے سماجی رابطے کی ویب سائٹ فیس بک پر تین جعلی اکاؤنٹس بنائے گئے ہیں جس کی وہ کئی مرتبہ شکایت بھی درج کرا چکی ہیں۔ انہوں نے مزید لکھا کہ فیس بک پر ان کے نام سے بنائے گئے جعلی اکاؤنٹس سے بھی نفرت انگیز اور بیہودہ باتیں لکھی جارہی ہیں، اس کے علاوہ شہلا رضا کے پیروکاروں سے وہ تحائف کی درخواست بھی کر رہے ہیں۔ شہلا رضا نے اپنے ٹوئٹر اکاؤنٹ پر ایک تصویر بھی جاری کی ہے جس میں انہوں نے اپنے نام سے فیس بک پر بنائے گئے تمام جعلی اکاؤنٹس کی نشاندہی کی ہے اور جعلی اکاؤنٹس بنانے والوں کے خلاف سخت کاروائی کی درخواست کی ہے۔