اسلام آباد (مانیٹرنگ ڈیسک)معروف صحافی اور تجزیہ کار ڈاکٹر دانش نے نجی ٹی وی پروگرام میں انکشاف کیا ہے کہ جو بھی وزیراعظم اپنی مدت مکمل کرنے کے بعد گھر جاتا ہے تو کابینہ ڈویژن کے حکم کے مطابق اسے ایک گاڑی دی جاتی ہے ، یہ گاڑی ایک لگژری اور آرمرڈ گاڑی ہوتی ہے۔

انہوں نے وزیراعظم عمران خان کو مخاطب کرتے ہوئے کہا کہ وہ اس وقت یہ پروگرام سن رہے ہوں گے اس لیے میں ان تک یہ پیغام پہنچانا چاہتا ہوں کہ نواز شریف سے پہلے جتنے بھی وزیراعظم تھے ان سب کو مدت مکمل کرنے کے بعد ایک ایک گاڑی دی گئی۔ لیکن مجرم وزیراعظم نواز شریف کو شاہد خاقان عباسی نے ایک سے زائد گاڑیاں دیں۔شاہد خاقان عباسی نے 28 مئی کو جس سمری پر دستخط کیے اس کے مطابق دو آرمرڈ گاڑیاں جو بلٹ پروف اور بم پروف ہیں، ان میں سے ایک مرسڈیز جس کا نمبر جی ای ڈی 059 ہے اور ایک اور گاڑی جو بی ایم ڈبلیو ہےاور اس کا نمبر جی اے ڈی 051 ہے، مجرم وزیراعظم نواز شریف عطا کر دی گئیں۔ڈاکٹر دانش نے کہا کہ میں نے یہ معلومات دے دی ہیں، اگر ان پر کوئی اعتراض اٹھانا چاہے تو میں حاضر ہوں ، میں نے خود ان گاڑیوں کا نمبر دیا ہے۔ ان گاڑیوں کو عوام کے ٹیکس کے پیسوں سے خریدا گیا اور پاکستان کا ایسا شخص جو مجرم ہے اسے شاہد خاقان عباسی نے یہ گاڑیاں عنایت کر دیں۔ ڈاکٹر دانش نے کہا کہ جو 33 گاڑیاں منگوائی تھیں وہ سرکاری کاموں میں استعمال نہیں ہوتیں ماسوائے سارک کانفرنس کے، ورنہ یہ ساری گاڑیاں جن کی مالیت کروڑوں روپے ہے ان کو ذاتی استعمال کے لیے خریدا جاتا ہے۔واضح رہے کہ نواززشریف اس وقت اڈیالہ جیل میں قید ہیں ۔