اسلام آباد (نیوز ڈیسک) وزیراعظم عمران خان کی اہلیہ اور خاتون اول بشریٰ عمران غیر ملکی دوروں کے موقع کیسا لباس استعمال کریں گی، اس حوالے سے ایک موقر قومی اخبار نے اپنی رپورٹ میں کہا ہے کہ خاتون اول بشریٰ عمران غیر ملکی دوروں کے دوران ایرانی طرز کا عبائیہ ا ستعمال کیا کریں گی جس میں ان کا پردہ بھی ہو گا لیکن ایرانی خواتین کی طرح صرف چہرہ نظر آئے گا لیکن عبائیہ کی وجہ سے باقی جسم پوری طرح سے پردے میں ہو گا، رپورٹ
میں کہا گیا ہے کہ اس بات کا فیصلہ بشریٰ عمران نے صرف اور صرف غیر ملکی دوروں کے لیے کیا ہے، خاتون اول پاکستان میں اپنا یہی پردے والا خصوصی برقعہ استعمال کریں گی جو وہ کر رہی ہیں۔ رپورٹ میں تحریک انصاف کے ذرائع کے حوالے سے بتایا گیا ہے کہ وزیراعظم عمران خا ن نے پردے کے حوالے سے ہر قسم کے فیصلے کو بشریٰ عمران پر چھوڑ دیا ہے اور ان کا کہنا ہے اس حوالے سے بشریٰ جو بھی فیصلہ کریں ان کو کوئی اعتراض نہیں۔
