اسلام آباد(مانیٹرنگ ڈیسک)تحریک انصاف کے رکن قومی اسمبلی اور سابق وزیراعلیٰ خیبرپختونخوا پرویز خٹک سپیکر چیمبر کا تقدس بھلا بیٹھے، میڈیا نمائندوں کے سامنے سپیکر چیمبر میں سوٹے چلتے رہے۔ تفصیلات کے مطابق تحریک انصاف کے اسد قیصر گزشتہ روز قومی اسمبلی کے سپیکر منتخب ہو کر ذمہ داریاں سنبھال چکے ہیں۔ ایسے میں گزشتہ روز اسمبلی اجلاس کے بعد اسد قیصر اپنے چیمبر میں بیٹھے تاکہ ممبران اسمبلی اور اپنی جماعت کے رہنمائوں اور اراکین کی جانب سے مبارکبادیں
وصول کر سکیں اور جو ممبر اسمبلی ان سے ملاقات کرنا چاہے کر سکے۔ اس دوران پرویز خٹک سپیکر چیمبر میں تشریف لے گئے اور وہاں میڈیا نمائندوں کی بھی ایک بڑی تعداد موجود تھی ۔ سابق وزیراعلیٰ خیبرپختونخواہ اور موجودہ رکن قومی اسمبلی پرویز خٹک نے سپیکر چیمبر کے تقدس کو پامال کرتے ہوئے سپیکر چیمبر میں سوٹے لگانے شروع کر دئیے اور سگریٹ پیتے ہوئے گفتگو کرتے رہے۔ اس دوران کئی بار ممبر اسمبلی بننے والے پرویز خٹک تمام پارلیمانی اقدار کو پامال کرتے رہے۔
