اسلام آباد (این این آئی)الیکشن کمیشن آف پاکستان نے ووٹرز کیلئے ووٹ ڈالنے کا طریقہ کار جاری کر دیا ہے ٗ قومی اسمبلی کے لئے بیلٹ پیپرزکا رنگ سبز جبکہ صوبائی اسمبلیوں کے لئے سفید ہو گا ٗووٹر کے لئے چار مراحل ہوں گے جس میں پہلے مرحلے میں پولنگ آفیسر اصل قومی شناختی کارڈ اور انتخابی فہرست میں درج تفصیلات دیکھے گا ٗ ووٹر کا نام اور سلسلہ نمبر بلند آواز میں پولنگ ایجنٹ کو بتایا جائے گا اور انتخابی فہرست سے ووٹر کا نام کاٹ دیا جائے گا۔
اس کے بعد انگوٹھے کا نشان لیا جائے گا اور انگوٹھے کا انمٹ سیاہی کا نشان لگایا جائے گا۔ مطلوبہ کاؤنٹرز فائلز پر انگوٹھے کے نشانات لگوانے کے بعد قومی اور صوبائی اسمبلی کے اسسٹنٹ پریذائیڈنگ آفیسر بیلٹ پیپرز کی پشت پر دستخط اور مہر ثبت کرنے کے بعد سبز رنگ کا بیلٹ پیپر قومی اسمبلی اور صوبائی اسمبلی کیلئے سفید رنگ کا بیلٹ پیپر جاری کریں گے جس کے بعد ووٹر سکرین کے پیچھے جا کر اپنے پسند کے کسی ایک امیدوار کے انتخابی نشان پر 9 خانوں والی مہر لگائے گا۔ سبز رنگ کا بیلٹ پیپر سبز رنگ کے ڈھکن والے بیلٹ باکس جبکہ سفید رنگ کا بیلٹ پیپر سفید رنگ والے بیلٹ باکس میں ڈالا جائے گا۔ الیکشن کمیشن نے ووٹروں سے کہا ہے کہ وہ اپنا اصل قومی شناختی کارڈ ہمراہ لائیں۔ فوٹو کاپی یا شناختی کارڈ کے علاوہ کوئی اور دستاویز قابل قبول نہیں ہوگی تاہم زائد المیعاد شناختی کارڈ پر بھی ووٹ قابل قبول ہوگا۔ مریضوں، حاملہ خواتین، معذور افراد، بزرگ شہریوں اور خواجہ سراؤں کو پولنگ کے عمل میں ترجیح دی جائے گی۔ ووٹروں سے کہا گیا ہے کہ وہ ووٹ کی رازداری کا ہر حال میں خیال رکھیں۔ پولنگ اسٹیشن کے اندر موبائل فون اور کیمرہ لانے کی اجازت نہیں ہوگی۔ ووٹنگ کا عمل صبح 8 بجے سے شام 6 بجے تک بغیر کسی وقفہ کے جاری رہے گا۔ پولنگ کے مقررہ وقت کے اختتام کے بعد بھی پولنگ اسٹیشن کی حدود میں موجود ووٹرز اپنا ووٹ ڈال سکیں گے۔ انتخابی عملے، سیکورٹی اہلکاروں اور مبصرین سے کہا گیا ہے کہ وہ پولنگ کے عمل کے دوران غیر جانبدار رہیں اور پریذائیڈنگ آفیسر کے قانونی حکم کی تعمیل کریں۔
