اسلام آباد(مانیٹرنگ ڈیسک) کل25جولائی پولنگ ڈے، الیکشن کمیشن نے انتخابی عملے اورووٹرز کیلئے ہدایات جاری کر دیں۔ تفسیلات کے مطابق کل 25جولائی پاکستان میں عام انتخابات کے سلسلے میں پولنگ ڈے کے طور پر مقرر کیا گیا ہے ۔ پولنگ کا عمل صبح 8 بجے سے شام 6 بجے تک بغیر کسی وقفے کے جاری رہے گا اور مقررہ وقت کے ختم ہونے پر پولنگ اسٹیشن کے احاطے میں

موجود ووٹرز کو اپنا ووٹ ڈالنے کی اجازت ہوگی۔پولنگ ڈے کے دن انتخابی عملے اور ووٹرز کیلئے الیکشن کمیشن نے ہدایات جاری کر دی ہیں ۔ الیکشن کمیشن نے انتخابی عملے، سکیورٹی اہلکار اور پولگنس سٹیشن پر موجود افراد کیلئے لازم قرار دیا ہے کہ وہ ووٹ کی رازداری کا خیال رکھیں۔ یکیورٹی اہلکار پرائزئیڈنگ آفیسر کو اس کی قانونی ذمہ داریوں کے مؤثر اور بھرپور انداز میں ادائیگی میں معاونت کریں گے اور اس بات کو یقینی بنائیں گے کہ ووٹرز کو پولنگ اسٹیشن پر پرامن، دوستانہ اور محفوظ ماحول میسر ہو اور ووٹرز کو کسی بھی صورت میں ووٹنگ سے روکنے کے لیے ڈرایا یا دھمکایا نہ جاسکے۔الیکشن کمیشن کے مطابق تمام پولنگ ایجنٹ اپنا شناختی بیج نمایاں طور ہر ہمہ وقت آویزاں رکھیں تاکہ ان کی پہنچان میں دشواری پیش نہ آئے جب کہ الیکشن کمیشن نے ووٹرز سے درخواست کی ہے کہ وہ انتخابی عملے اور سیکیورٹی اہلکاروں سے تعاون کریں۔ ووٹر اپنے حلقے میں قومی اسمبلی اور صوبائی اسمبلی کے ایک ایک امیدوار کو ووٹ دے سکے گا، قومی اسمبلی کے لیے سبز اور صوبائی اسمبلی کے لیے سفید بیلٹ پیپر دستیاب ہوگا جن پر امیدواروں کے نام کے ساتھ ان کے انتخابی نشان موجود ہوں گے۔ووٹر کو سب سے پہلے پولنگ اسٹیشن میں موجود افسر کو اپنا شناختی کارڈ دکھانا ہوگا جس کے بعد ووٹر کو ووٹرز فہرست میں موجود اپنا نام تلاش کرنے کے بعد

وہاں انگوٹھا لگانا ہوگا، اس کے بعد ووٹر کے انگوٹھے پر سیاہی لگائی جائے گی۔اس عمل کے بعد ووٹر کو بیلٹ پیپرز کی کتاب پر مختص جگہ پر انگوٹھا لگانا ہوگا جس کے بعد مقررہ افسر ووٹر کو سبز اور سفید رنگ کے دو بیلٹ پیپرز دے گا۔پولنگ کے کمر ے میں ہی ووٹر خفیہ رائے شماری کے لیے مختص مقام پر جاکر اپنے من پسند امیدوار کے نشان پر ٹھپہ لگائے گا جس کے بعد سبز بیلٹ پیپر کو سبز بیلٹ باکس اور سفید بیلٹ پیپر کو سفید بیلٹ باکس میں ڈالنا ہوگا۔