سرگودھا/لاہور(مانیٹرنگ ڈیسک) سرگودھا کی تحصیل بھلوال کے چک11شمالی میں مسلح افراد نے گھر میں داخل ہو کرمیاں بیوی اورانکے تین بچوں سمیت پانچ افرادکو فائرنگ کرکے قتل اور ایک بچے کوزخمی کردیا،ملزمان جائے وقوعہ پر پسٹل چھوڑ کرفرار ہو گے۔پولیس نے زخمی بچے اور مقتولین کی نعشوں کو ہسپتال منتقل کر کے تفتیش شروع کر دی ہے۔

ذرائع کے مطابق نا معلوم افراد نے گھر میں داخل ہو کر گھر کے سربراہ طفیل اسکی بیوی مجیدہ بی بی ان کے بچے 3کاشف، ثمر اور بیٹی ثنا کو فائرنگ کرکے قتل کردیا۔واقعہ میں زخمی بچے ارشدکو تشویشناک حالت میں ٹی ایچ کیو بھلوال پہنچا دیا۔اور مقتولین کی نعشیں بھی پوسٹمارٹم کیلئے ہسپتال منتقل کر دی گئیں۔تاحال ابھی وجہ قتل اور ملزمان کا پتہ نہیں چل سکا۔علاقہ میں گھر کے اندر اچانک ایک ہی گھر کے پانچ افراد کے قتل سے علاقہ میں خوف وہراس پھیل گیا۔پولیس کو جائے وقوعہ سے پسٹل برآمد ہوا ہے ۔ ابھی وجہ معلوم نہیں پولیس تھانہ صدر بھلوال مصروف تفتیش ہے۔ دوسری جانب ڈپٹی سپرنٹنڈنٹ پولیس (ڈی ایس پی) بھلوال خالد خان نیازی کے مطابق شواہد اکٹھے کرنے کے بعد تفتیش کا آغاز کردیا گیا ہے جبکہ ملزمان کی گرفتاری کے لیے چھاپے مارے جارہے ہیں۔پولیس کے مطابق مقتول گھرانے کا قتل ہونے والا سربراہ مٹھائی کی دکان کا مالک تھا۔قتل ہونے والوں میں 50 سالہ محمد طفیل اور 40 سالہ مجیدہ بی بی سمیت ان کے دو بیٹے اور ایک بیٹی شامل ہیں جن کی عمریں بالترتیب 20، 18 اور 16 سال ہیں۔نگران وزیراعلیٰ پنجاب ڈاکٹر حسن عسکری نے واقعے میں ایک ہی خاندان کے 5 افراد کے قتل پر افسوس کا اظہار کرتے ہوئے انسپکٹر جنرل (آئی جی) پنجاب سے واقعے کی رپورٹ طلب کرلی۔نگران وزیراعلیٰ پنجاب کا کہنا تھا کہ واقعے میں ملوث ملزمان کو قانون کے کٹہرے میں لایا جائے اور لواحقین کو انصاف کی فراہمی یقینی بنائی جائے۔