لاہور( نیوز ڈیسک)مسلم لیگ (ن) کے رہنما خواجہ سعد رفیق اور رانا مشہود احمد خان ٹکٹ نہ ملنے قیادت سے ناراض ہونے والے پارٹی رہنما زعیم حسین قادری کو منانے میں ناکام رہے ،دونوں رہنمادو گھنٹے تک تحفظات دور کرانے کی یقین دہانی کراتے رہےتاہم زعیم قادری نے آزاد حیثیت میں انتخاب لڑنے کا اعلان کر دیا ۔ تفصیلات کے مطابق زعیم حسین قادری کی سہ پہر چار بجے پریس کانفرنس کی اطلاع پر
خواجہ سعد رفیق اور رانا مشہود احمد خان ٹاؤن شپ پہنچ گئے اور زعیم حسین قادری سے ملاقات کی ۔ اس موقع زعیم حسین قادری کے حامیوں نے ظلم کے ضابطے ہم نہیں مانتے ، قادری تیرا اک اشارہ حاضر حاضر لہو ہمارا ، قادری تیرے جانثار بے شمار بے شمار کے نعرے لگائے ۔ خواجہ سعد رفیق نے زعیم قادری کو گلے بھی لگایا اور بعد ازاں تینوں رہنما ملاقات کیلئے الگ کمرے میں چلے گئے جہاں تقریباً دو گھنٹے تک ملاقات ہوئی ۔اس موقع پر زعیم قادری قیادت کے فیصلے کے خلاف پھٹ پڑے جس پر دونوں رہنماؤں نے انکے تحفظات دور کرنے کی یقین دہانی کرائی تاہم زعیم قادری نے ماننے سے انکار کردیا اور آزاد حیثیت میں انتخابات میں حصہ لینے کا اعلان کر دیا ۔ علاوہ ازیں تحریک انصاف نے زعیم حسین قادری کو تحریک انصاف میں شمولیت کی دعوت دیتے ہوئے کہا ہے کہ زعیم قادری کیلئے دروازے کھلے ہیں ۔ وسطی پنجاب کے صدر عبد العلیم خان نے کہا کہ زعیم قادری سیاسی پختگی رکھنے والے رہنما ہیں ۔ کارکنوں کا استحصال کرنا (ن) لیگ کا وطیرہ ہے ۔ انہوں نے کہا کہ زعیم قادری بارش کا پہلا قطرہ ہے ۔اس سے (ن) لیگ کی اصلیت سامنے آ گئی ہے۔
