اسلام آباد (این این آئی)پاکستان تحریک انصاف کے ترجمان نے کہاہے کہ سینئر قائدین کے اجلاس کے بارے میں منفی اطلاعات افسوسناک اور قابل مذمت ہیں۔ایک بیان میں ترجمان نے کہاکہ سینئر قائدین کے مابین اختلافات کی خبریں بالکل بے بنیاد اور قیاس آرائیوں کا نتیجہ ہیں۔ ترجمان نے کہا کہ بلاتصدیق ایسی اطلاعات کی اشاعت غیر ذمادارانہ طرز صحافت کا اظہار ہے۔ ترجمان نے کہاکہ تحریک انصاف کی قیادت مکمل طور پر یکسو اور متحد ہے۔ ترجمان نے کہا کہ ہمیشہ کیطرح آج کے اجلاس میں
مکمل مشاورت اور اتفاقِ رائے سے اہم فیصلے کئے گئے۔ ترجمان نے کہاکہ میڈیا ڈیپارٹمنٹ کی جانب سے جاری مفصل اعلامیے کے اجراء کے باوجود اس قسم کی افواہ سازی انتہائی قابل مذمت ہے۔ترجمان نے کہاکہ قیاس آرائیوں اور ناقص معلومات کی بنیاد پر افواہوں کا بازار گرم کرنے کی بجائے ذمہ داری کا ثبوت دیا جائے۔واضح رہے کہ تحریک انصاف کے کور گروپ کے اجلاس میں پارٹی کے دو سینئر ترین ارکان شاہ محمود قریشی اور جہانگیر ترین میں سخت جملوں کا تبادلہ ہوا ہے۔ میڈیا رپورٹ کے مطابق منگل کو بنی گالا میں عمران خان کی زیرصدارت پی ٹی آئی کور گروپ کا اجلاس جاری تھا کہ اس دوران شاہ محمود قریشی نے الیکشن کمیشن کے فیصلے کے بعد رائے حسن نواز کی پارٹی میں اہلیت کو چیلنج کیا اور کہا کہ رائے حسن نواز نااہلی کے بعد پارٹی کاعہدہ اور اجلاسوں میں شرکت کے مجاز نہیں۔شاہ محمود قریشی کے اعتراض پر جہانگیر ترین نے اعتراض کرتے ہوئے کہا کہ شاہ صاحب آپ کا اشارہ میری طرف ہے جس کے بعد تلخی بڑھی اور دونوں جانب سے سخت جملوں کا تبادلہ ہوا، سینئر ارکان میں جھڑپ پر عمران خان نے مداخلت کی اور انہوں نے رائے حسن نواز کو پارلیمانی بورڈ سے ہٹانے اور کسی بھی عہدے پر نہ رکھنے کا اعلان کیا تو تنازع ختم ہوگیا۔معاملا رفع دفع ہونے کے بعد اجلاس کی مزید کارروائی آگے بڑھائی گئی اور تنظیموں امور سمیت الیکشن میں امیدواروں کو پارٹی ٹکٹ دینے کے لیے حکمت عملی پر غور کیا گیا۔
