اسلام آباد(مانیٹرنگ ڈیسک)برطانوی شہزادے ہیری اور ان کی اہلیہ امریکی اداکارہ میگھن مارکل کو پی آئی اے کی جانب سے پاکستان کے شمالی علاقہ جات میں ہنی مون منانے کی پیش کش۔ تفصیلات کے مطابق پاکستان کی قومی ائیر لائن پی آئی اے نے برطانوی نوبیاہتا شاہی جوڑے کو پاکستان کے شمالی علاقہ جات میں ہنی مون منانے کی پیش کش کردی ہے۔ پی آئی اےنے اپنے آفیشل ٹوئٹر اکاؤنٹ
پر شہزادہ ہیری کی والدہ آنجہانی لیڈی ڈیانا کی ایک یادگار تصویر شیئر کرتے ہوئے لکھا، ‘’’ہم نے شاہی شادی دیکھی اور لیڈی ڈیانا اور ان کے شمالی علاقہ جات کے دورے کو یاد کیا اور سوچا کہ یہ کتنا زبردست ہوگا کہ نو بیاہتا جوڑا بھی ہماری شمالی علاقہ جات کی خوبصورتی دیکھے۔ٹوئیٹ میں شہزادی ہیری اور میگھن مارکل کو مخاطب کرتے ہوئے مزید کہا گیا کہ ‘ہم بالکل تیار ہیں، آپ بس ہمیں بتا دیں کہ آپ لوگ کب آرہے ہیں‘‘۔پی آئی اے کی ٹویٹ سامنےآنے کی دیر تھی کہ سوشل میڈیاصارفین بھی میدان میں آگئے اور اس ٹویٹ پر تبصرے شروع ہوگئے۔ کسی نے قومی ایئرلائن کی اس پیشکش کو سراہا تو کسی نے اُلٹا پی آئی اے پر تنقید کرتے ہوئے کہا کہ پہلے اپنے ملک کے لوگوں کو تو وقت پر ان کی منزلوں پر پہنچا دیا جائے، پھر شاہی جوڑے کو مدعو کیا جائے۔اب دیکھنا یہ ہے کہ شہزادہ ہیری اور میگھن مارکل ہنی مون پر کہاں جائیں گے؟کیا وہ پی آئی اے کی پیش کش کو درخورداعتنا سمجھتے ہوئے اپنی والدہ شہزادی لیڈی ڈیانا کی روایت کو برقرار رکھیں گے یا نہیں۔ اس حوالے سے ابھی تک حتمی طور پر کوئی اعلان نہیں کیا گیا۔واضح رہے کہ شہزادہ ہیری کی والدہ پرنسز ڈیانا بھی شادی کے بعد پاکستان کے شمالی علاقہ جات کا دورہ کر چکی ہیں ۔ ان کے دورے کی تصاویر آج بھی پاکستان کے ساتھ ان کی محبت اور یہاں کے لوگوں کے ساتھ وابستگی کی یاد دلاتی ہیں۔ پی آئی اے کی جانب سے لیڈی ڈیانا کے پاکستان کے شمالی علاقہ جات کے دورے کی تصویر بھی شیئر کی گئی ہے۔
