اسلام آباد (مانیٹرنگ ڈیسک)مسلم لیگ ن کی بڑی وکٹ گرنے کا امکان، مزید کئی سیاستدان بھی شمولیت کا اعلان کرینگے۔ تفصیلات کے مطابق آج تحریک انصاف کے مینار پاکستان جلسے میں جہاں کئی سیاستدان شمولیت کا اعلان کرنے والے ہیں وہیں ن لیگ کی بڑی وکٹ گرنے کا بھی امکان ہے۔ ذرائع کے مطابق لاہور کے دیہی حلقے این اے 124 سے مسلم لیگ (ن) کے ٹکٹ پر ممبر قومی اسمبلی بننے والے شیخ روحیل اصغر تحریک انصاف کے جلسے میں شمولیت کا اعلان کر سکتے ہیں۔ شیخ روحیل اصغر جارحانہ انداز میں ن لیگ کی پالیسیوں
کے دفاع میں میڈیا پر متحرک نظر آتے رہے ہیں تاہم نواز شریف کی وزارت عظمیٰ اور پارٹی صدارت سے فراغت کے بعد شیخ روحیل اصغر منظر سے غائب ہو گئے ۔ شیخ روحیل اصغر کے قریبی حلقوں میں ہونے والی چہ میگوئیوں کے مطابق وہ وہ ن لیگ بالخصوص میاں نواز شریف کے بیانیے سے متفق نہیں جبکہ بجٹ اجلاس کے موقع پر بھی وہ قومی اسمبلی میں بھی نہیں آئے۔ذرائع کے مطابق شیخ روحیل اصغر ن لیگ سے راہیں جدا کرنے کا فیصلہ کر چکے ہیں اور آج کے تحریک انصاف کے میگا جلسے میں شمولیت کااعلان کر سکتے ہیں۔
