لاہور (این این آئی ) مبینہ جعلی پولیس مقابلے میں قصور کے رہائشی نوجوان مدثر کے کیس میں سابق ڈی او ناصررضوی سمیت 6پولیس اہلکاروں کے نام ای سی ایل میں شامل کردئیے گئے ۔ چیف جسٹس پاکستان جسٹس میاں ثاقب نثار نے مذکورہ کیس میں ازخود نوٹس لے رکھا ہے ۔مبینہ جعلی پولیس مقابلے کے کیس میں جن پولیس اہلکاروں کے نام ای سی ایل میں شامل کئے گئے ہیں ان میں سابق ڈی او قصورناصررضوی ،ڈی ایس پی عارف رشید ،ایس ایچ اوزیاض عباس ، طارق بشیر چیمہ ،یونس ڈوگر
اور کانسٹیبل محمد اشرف شامل ہیں ۔یادرہے کہ قصور میں گزشتہ سال 5 سالہ ننھی بچی ایمان فاطمہ کو اغوا کے بعد زیادتی کا نشانہ بنا کر قتل کردیا گیا تھا ، پولیس نے مدثر نامی نوجوان کو گرفتار کیا اور فروری 2017 میں جعلی پولیس مقابلہ کرکے اسے موت کے گھاٹ اتار دیا تھا۔ ایک سال تک ننھی ایمان فاطمہ کا خون بے گناہ مدثر کے کندھوں پر ہی رہا لیکن زینب قتل کیس کے بعد ملزم عمران ارشد کے اقبالی بیان اور ڈی این اے ٹیسٹ سے مدثر کی بے گناہی ثابت ہوگئی۔
