اسلام آباد (مانیٹرنگ ڈیسک)سابق وزیراعظم نواز شریف نے کل احتساب عدالت میں پیشی کے موقع پر میمو گیٹ میں سپریم کورٹ میں پیش ہونے کو غلطی قرار دیتے ہوئے اس غلطی کا اعتراف کیا ۔ میموگیٹ سکینڈل کے حوالے سے بات کرتے ہوئے نواز شریف کا کہنا تھا کہ انہیں میمو گیٹ سکینڈل میں آصف زرداری کے خلاف نہیں جانا چاہئے تھا۔ نواز شریف کی جانب سے غلطی کا اعتراف کئے جانے کے بعد گزشتہ روز نجی ٹی وی پروگرام میں معروف صحافی و پروگرام کے اینکر کامران خان نے 7سال قبل عاصمہ جہانگیر

کی میموگیٹ پر سپریم کورٹ کے احاطے میں کھڑے ہو کر میڈیا نمائندوں سے کی گئی گفتگو کی ویڈیو چلائی جس میں معروف قانون دان عاصمہ جہانگیر بات کرتے ہوئے کہہ رہی ہیں کہ میں زندہ رہوں یا نا رہوں لیکن ایک دن تم سب یاد کرو گے کہ سپریم کورٹ میں کھڑے ہو کر ایک عورت نے یہ بات کہی تھی کہ ایک دن یہ فیصلہ پٹیشنر کو تکلیف دے گا۔اور پٹیشنر یہ یاد رکھے کہ ایک عورت نے کہا تھا کہ ایک دن اس فیصلے کو آپ خود یہاں کھڑے ہو کر کہہ رہے ہوں گے کہ یہ فیصلہ قانون کے مطابق نہیں ہے۔