گوجرانوالہ (مانیٹرنگ ڈیسک) فورنزک لیب کی ابتدائی تفتیشی رپورٹ کے مطابق ڈپٹی کمشنر گوجرانوالہ سہیل احمد ٹیپو نے خود کشی کی ہے۔ذرائع کے مطابق ڈی سی گوجرانوالہ کی پراسرار موت کے حوالے سے فورنزک لیب سے حاصل کی گئی ابتدائی معلومات کے مطابق سہیل احمد ٹیپو کے قتل کے کوئی شواہد نہیں ملے ہیں۔تفتیشی ذرائع کے مطابق خودکشی کی وجہ شدید ذہنی دباؤ تھا اور سہیل ٹیپو نے 13 مارچ کو کمشنر گوجرانوالہ سے اپنی ذہنی حالت کا اظہار بھی کیا تھا۔ تفتیشی
ذرائع نے بتایا کہ کمشنر نے ڈاکٹر کو دفتر بلوا کر سہیل ٹیپو کا طبی معائنہ بھی کرایا اور سہیل ٹیپو نے خود ڈاکٹر کو بتایا کہ وہ شدید ذہنی تناؤ کا شکار ہیں۔تفتیشی ذرائع کا کہنا ہے کہ ڈاکٹر نے سہیل احمد ٹیپو کو ادویات کے ساتھ 14 روز آرام کی تجویز دی تھی۔نجی ٹی وی کے مطابق ڈسٹرکٹ ہیڈ کوارٹر ہسپتال کے ڈاکٹر نوید اسلم کا لکھا گیا نسخہ بھی منظر عام پر آگیا ہے ۔خیال رہے کہ دو روز قبل سہیل احمد ٹیپو کی لاش ڈی سی ہاؤس گوجرانوالہ سے برآمد ہوئی تھی۔
