ٹوکیو (مانیٹرنگ ڈیسک) جاپان کے سائنسدانوں کا کہنا ہے کہ جسم میں اگر وٹامن ڈی کی مناسب مقدار موجود ہو تو کینسر سے بچاؤ میں مدد ملتی ہے، ایک جریدے بی ایم جی کی رپورٹ کے مطابق جاپانی سائنسدانوں نے اپنی تحقیق میں پتہ چلایا ہے کہ انسانی جسم میں وٹامن ڈی کی مناسب مقدار موجود ہو تو کئی اقسام کے کینسر سے بچاؤ ممکن ہے۔

یہ تحقیق اس نظریے کو مدد فراہم کرتی ہے کہ وٹامن ڈی بعض اقسام کے کینسر کو روکنے اور ان سے محفوظ رکھنے میں معاون ثابت ہوتا ہے۔ وٹامن ڈی قدرتی طور پر حاصل کرنے کا بہترین ذریعہ سورج کی روشنی ہے۔ جسم میں اگر کیلشیم کی مناسب مقدار موجود ہو تو وٹامن بی کی مدد سے انسانی ہڈیاں، دانت اور عضلات مضبوط اور صحت مند رہتے ہیں۔ جریدے کی رپورٹ کے مطابق تحقیق کے دوران 40 سے 69 سال عمر کے 33736 افراد کی میڈیکل ہسٹری کو دیکھا گیا۔ ان افراد میں مختلف اقسام کے کینسر کی موجودگی یا خدشے کے بارے میں ٹیسٹ کیے گئے جبکہ ان کے خون کے نمونے لے کر اس میں وٹامن ڈی کی مقدار کا معائنہ بھی کیاگیا، رپورٹ کے مطابق ان افراد کا طبی مشاہدہ سولہ سال تک جاری رہا اور اس مشاہدے سے نتیجہ اخذ کیا گیا کہ وٹامن ڈی کی موزوں مقدار جسم میں موجود ہو تو متعدد اقسام کے کینسر کا خدشہ 20 فیصد کم ہوجاتا ہے۔ وٹامن ڈی کی بدولت جگر کے کینسر کا خدشہ دیگر اقسام کی نسبت اور بھی کم یعنی 50 فیصد کم پایا گیا۔ پھیپھڑوں اور پراسٹیٹ کے کینسر کے لیے وٹامن ڈی کے نمایاں اثرات نہیں پائے گئے اس کے علاوہ کسی بھی کیس میں وٹامن ڈی کے کینسر کے مریضوں پر منفی اثرات بھی دیکھنے میں نہیں آئے۔  جاپان کے سائنسدانوں کا کہنا ہے کہ جسم میں اگر وٹامن ڈی کی مناسب مقدار موجود ہو تو کینسر سے بچاؤ میں مدد ملتی ہے