کوئٹہ (آن لائن)قومی احتساب بیورو بلوچستان نے کرپٹ عناصر کے خلاف کا روائیوں میں تیزی لاتے ہوئے نیب کو مطلوب کرپٹ عناصر کا ناطقہ بند کرنے کا فیصلہ کر لیا ہے، ڈائر یکٹر جنرل نیب بلوچستان مرزامحمد عرفان بیگ نے مفرور ملزمان کی فوری گرفتاری کے احکامات جاری کر دئیے ۔ نیب کی انٹیلی جنس ٹیم نے حساس اداروں سمیت تمام متعلقہ اداروں سے رابطہ کر کے مفرور ملزمان کی لسٹ اعلیٰ افسران کے حوالے کر دی،
شیخ شعیب محمد اور ثاقب صدیق کی سربراہی میں نٹیلی جنس ٹیم نے بلوچستان کے مختلف علاقوں میں مفرور ملزمان کی گرفتاری کے لئے ٹیمیں تشکیل دے دیں۔ڈی جی نیب بلوچستان نے کرپشن کے خاتمے کے عزم کا اظہار کرتے ہوئے کہا ہے چیئرمین نیب جسٹس جاوید اقبال کے وژن کی روشنی میں کرپشن سے متعلق شکایات کی جانچ پڑتال سے لیکر ریفرنس دائر کرنے کے ٹائم فریم کی مکمل پابندی کے ساتھ ساتھ مفرور ملزمان کی گرفتاری کو بھی یقینی بنایا جا رہا ہے ۔انہوں نے کرپشن اور کرپٹ عناصر کی نشاندہی کے لئے عوام کے کردار کو ناگزیر قرار دیا اور کہا عوام الناس کے تعاون سے کرپٹ عناصر کا محاسبہ ممکن ہو سکتا ہے ۔انہوں نے کرپشن کے تدارک اور مکمل روک تھام کے لئے شعور و آگاہی کی ضرورت پر زور دیتے ہوئے کہا کرپشن کا خاتمہ صرف اس صورت ممکن ہے جب ہم اس کو قبیح فعل سمجھیں گے۔
