اسلام آباد (مانیٹرنگ ڈیسک)پی ٹی آئی کے چئیرمین عمران خان نے لاہور کو دنیا کا آلودہ ترین شہر قراردے دیا۔نجی ٹی وی کے مطابق تحریک انصاف کے چئیرمین عمران خان کا ایک تقریب سے خطاب کے دوران کہنا تھا کہ لاہور دنیا کا سب سے آلودہ شہر ہےاور لاہور کے70فیصد شہریوں کو پینے کاصاف پانی بھی میسر نہیں ہے جب کہ پنجاب کے سارے پرانے جنگلات بھی ختم کر دئیے گئے ہیں لیکن ہم نے خیبر پختونخوا میں 40چھانگا ما نگا اگائے ہیں۔
عمران خان کا مزید کہنا تھا کہ مجھے شوکت خانم کے نظام پر فخر ہے۔ہم نے خیبر پختونخوا میں سب سے زیادہ بجٹ صحت پرلگایا ہے۔لیکن شہباز شریف ایک بھی ہسپتال نہ بنا سکے۔جب کہ شہباز شریف کے پاس 9ہزار ارب کا بجٹ تھا۔دریں اثنا چیئرمین پاکستان تحریک انصاف عمران خان نے کہا ہے کہ دنیا میں کہیں قومی اثاثوں کی نجکاری نہیں کی جاتی‘ حکومت کے پاس پی آئی اے کی نجکاری کرنے کا مینڈیٹ نہیں ہے‘ کرپشن اس ملک کا اصل مسئلہ ہے‘ ایمانداری سے ادارے چلائے جائیں تو نجکاری کی ضرورت نہیں ہوتی۔ اتوار کو عمران خان نے کارکنوں سے خطاب کرتے ہوئے کہا کہ حکومت کے تین ماہ رہ گئے ہیں۔ حکومت کے پاس مینڈیٹ نہیں کہ پی آئی اے کی نجکاری کرے۔ حکومت کے پاس پرائیویٹائزیشن کا کوئی مینڈیٹ نہیں ہے دنیا میں کہیں قومی اثاثوں کی نجکاری نہیں کی جاتی۔ ہم پی آئی اے میں سیاسی مداخلت ختم کریں گے۔ پی آئی اے کو ایسی ایئرلائن بنائیں گے جس پر پوری دنیا کو فخر ہوگا۔ ایمانداری سے ادارے چلائے جائیں تو نجکاری کی ضرورت نہیں ہوگی۔ ملک میں اگلی حکومت تحریک انصاف کی ہوگی کرپشن اس ملک کا اصل مسئلہ ہے۔
