کوئٹہ (این این آئی )احتساب عدالت کوئٹہ نے نیب ریفرنس میں جعلی ہاؤسنگ اسکیم بنا کر لوگوں کو لوٹنے والے جعلساز سید محسن علی کو پانچ سال قید اورستاسی لاکھ روپے جرمانہ کی سزا سنادی۔ عدم ادائیگی کی صورت مزید سزا کاٹنی پڑے گی۔ملزم سید محسن علی نے کوئٹہ کے نواحی علاقے بلیلی میں پائن ٹاؤن کے نام سے ہاؤسنگ سکیم شروع کی جس میں عوام الناس سے پلاٹوں کی مد میں رقومات وصول کی گئی جبکہ قبضہ کسی کو نہیں دیا گیا۔

متاثرین نے اس ضمن میں قومی احتساب بیورو بلوچستان سے رجوع کیا تو نیب نے ملزم کیخلاف تحقیقات مکمل کرکے ریفرنس احتساب عدالت میں دائر کر دیا۔احتساب عدالت کے جج مجید ناصر نے نیب پراسیکیوٹر راشد گولڑہ اور نیب کی تحقیقاتی ٹیم کی تحقیقات کی روشنی میں ملزم سید محسن علی کو پانچ سال سزا اور 87,67,753/۔(ستاسی لاکھ ستاسٹھ ہزار سات سو تریپن) روپے کے جرمانہ کی سزاسنادی۔عدم ادائیگی کی صورت مزید سزا کاٹنی پڑے گی ۔