اسلام آباد(مانیٹرنگ ڈیسک)پاکستان کی معروف وکیل اور انسانی حقوق کی علمبردار عاصمہ جہانگیر کے ایصال ثواب کیلئے قرآن خوانی ، سیاستدانوں، وکلا رہنمائوں، سول سوسائٹی کے اراکین اور دیگر شعبوں سے تعلق رکھنے والی شخصیات کی شرکت۔ تفصیلات کے مطابق پاکستان کی معروف وکیل اور انسانی حقوق کی علمبردار عاصمہ جہانگیر کے ایصال ثواب کیلئے قرآن خوانی کا انعقاد کیا گیا
جس میں سیاستدانوں، وکلا رہنمائوں، سول سوسائٹی کے اراکین اور دیگر شعبوں سے تعلق رکھنے والی شخصیات نےشرکت کی۔ قرآن خوانی کا انعقاد ان کی رہائش گاہ پر کیا گیا تھا ۔ جماعت اسلامی کے بانی سید ابولاعلیٰ مودودیؒ کے جماعت اسلامی سے منحرف صاحبزادے سید حیدر فاروق مودودی نے قرآن خوانی کے بعد دعا کرائی۔ علاوہ ازیں سپریم کورٹ بار ایسوسی ایشن کے عہدیداروں نے عاصمہ جہانگیر کی خدمات کے پیش نظر سپریم کورٹ بار ایسوسی ایشن ہاسٹل کو عاصمہ جہانگیر آڈیٹوریم اور لائبریری کو عاصمہ جہانگیر لائبریری سے منسوب کر دیا۔ قبل ازیں وکلا نے ممتاز قانون دان عاصمہ جہانگیر کی وفات کا تیسرے روز بھی سوگ منایا۔ سپیکر قومی اسمبلی سردار ایاز صادق سپریم کورٹ بار ایسوسی ایشن کی سابق صدر ، انسانی حقوق کی علمبردار عاصمہ جہانگیر کے گھر گئے اور ان کے اہل خانہ سے اظہار تعزیت اور عاصمہ جہانگیر کیلئے دعائے مغفرت کی۔خیال رہے کہ معروف قانون دان عاصمہ جہانگیر دل کا دورہ پڑنے کے باعث اپنے گھر میں صبح کے وقت انتقال کر گئی تھیں۔ بتایا جاتا ہے کہ دل کا دورہ پڑنے سے پہلے وہ نواز شریف اور ان کے وکیل اعظم نذیر تارڑ سے موبائل کال پر محو گفتگو تھیں۔ عاصمہ جہانگیر کی نماز جنازہ دو روز قبل لاہور کے قذافی سٹیڈیم سے ملحقہ ایل سی سی گرائونڈ میں ادا کی گئی تھی جس میں کثیر تعداد میں مرد و خواتین نے شرکت کی۔
سید حیدر فاروق مودودی نے عاصمہ جہانگیر کی نماز جنازہ پڑھائی تھی۔
