اسلام آباد(این این آئی)آل پاکستان مسلم لیگ کے سیکرٹری جنرل ڈاکٹر محمدامجد کے نکاح کے حوالے سے گردش کرنے والی خبروں پر ردعمل کا اظہار کرتے ہوئے ان کے وکیل سید وسعت الحسن شاہ ایڈووکیٹ ہائی کورٹ نے کہا ہے کہ یہ مقدمہ بلیک میل کر کے دولت کے حصول کے لئے درج کروایا گیا۔اس سے قبل ماتحت عدالتوں میں عدم ثبوت کی بنیاد پر اس مقدمہ کو جھوٹا قراردیا جاچکا ہے۔
مقدمے کے پیچھے ایک معروف سیاسی شخصیت جو کہ سیاستدان بھی ہے،کارفرما ہے۔انہوں نے کہا کہ ڈاکٹر محمدامجد کی ساکھ کو نقصان پہنچانے اور بلیک میل کر کے دولت بٹورنے کے لئے یہ مقدمہ درج کیاگیا۔ ہم نے پہلے بھی عدالت میں حاضر ہوکر اپنا دفاع کیا تھا اور اب بھی اپنی صفائی پیش کریں گے۔
