اسلام آباد (این این آئی) پاکستان تحریک انصا ف کے سربراہ عمران خان کی سابقہ اہلیہ ریحام خان نے کہا ہے کہ مستقل بنیادوں پر نہیں عارضی وقت کیلئے ملک کو چھوڑا ہے ٗ کتاب کی اشاعت اور بچوں کو برطانیہ میں سیٹل کر نے کے بعد واپس آ جاؤنگی ٗطلاق کے بعد عمران خان نے موبائل پیغام میں کہا آپ کو پاکستان چھوڑ کر برطانیہ میں مستقل رہائش اختیار کرنی چاہیے۔ منگل کو نجی ٹی وی کے مطابق ریحام خان سے ملک چھوڑ نے کی وجوہات جانے کیلئے

جب رابطہ کیا گیا اور ان سے ملک چھوڑے جانے سے متعلق پوچھا تو انہوں نے وضاحت کی کہ انہوں نے مستقل بنیادوں پر نہیں بلکہ عارضی وقت کیلئے ملک کو چھوڑا ہے، اور وہ کتاب کی اشاعت اور بچوں کو برطانیہ میں سیٹل کرنے کے بعد واپس وطن آئیں گی۔انہوں نے دھمکیوں سے متعلق کہا کہ انہیں کسی ایک قسم کی خاص دھمکیاں نہیں ملیں تاہم ان سے پاکستان کرکٹ ٹیم کے ایک سابق کپتان نے رابطہ کیا اور کہا کہ وہ عمران خان سے متعلق باتیں کرنا چھوڑ دیں۔ریحام خان نے بتایا کہ طلاق کے بعد عمران خان نے انہیں موبائل پیغام میں کہا کہ انہیں پاکستان چھوڑ کر برطانیہ میں مستقل رہائش اختیار کرنی چاہیے۔انہوں نے اس عزم کا اعادہ بھی کیا کہ کتاب کی اشاعت کے بعد وہ وطن واپس آئیں گی۔