ریاض(آن لائن) سعودی ریجنل پولیس نے غیر قانونی تارکین کیخلاف مہم کے دوران دارالحکومت ریاض کے نواحی علاقے الثمامہ میں کارروائی کرتے ہوئے 50 غیر معیاری ہوٹل اور دکانیں منہدم کر دیں ۔سعودی میڈیا رپورٹ کے مطابق منگل کو ترجمان پولیس نے نجی ٹی وی سے بات چیت کرتے ہوئے کہا کہ مملکت میں جاری غیر قانونی تارکین کیخلاف مہم کے دوران الثمامہ کے مضافاتی علاقے میں غیر قانونی طور پر نامعلو م افراد نے عارضی ہوٹل اور دکانیں قائم کی ہوئی تھیں جہاں غیر معیاری کھانا اور دیگر اشیاء فروخت کی جاتی تھی ۔
پولیس اور دیگر اداروں کے اہلکاروں پر مشتمل ٹیم نے جب مذکورہ علاقے کا دورہ کیا تو وہاں غیر قانونی طورپر قائم کئے گئے ریسٹورانٹ اور دکانوں کا انکشاف ہوا،مذکورہ مقام پر لوگ تفریح کیلئے آتے تھے جنہیں یہ افراد غیر معیاری خوراک ، عارضی خیمے ، چٹائیاں اور دیگر ضرورت کی اشیاء کرائے پر فراہم کرتے تھے۔ انہوں نے کہا کہ تفتیشی ٹیموں نے 50 دکانوں اور ہوٹلوں کو مسمار کر دیا جبکہ متعدد غیر قانونی تارکین وطن کو بھی زیر حراست لیا ہے،ہوٹلوں سے برآمد ہونے والی غیر معیاری اشیاء خورونوش بھی ضبط کر کے تلف کر دی گئی۔