لاہور (ا ین این آئی) پاکستان پیپلز پارٹی کے زیر اہتمام یوم یکجہتی کشمیر کے موقع پر موچی گیٹ میں منعقدہ جلسے کے موقع پر سائن بورڈ کارکنوں پر آگرا جس سے متعدد زخمی ہو گئے ۔ تفصیلات کے مطابق موچی گیٹ جلسہ کے آغاز پر پیپلز پارٹی کے قائدین کی تصاویر والا سائن بورڈ کارکنوں پر آگرا جس کے نتیجے میں متعدد زخمی ہو گئے ۔ اس موقع پر اسٹیج پر موجود پیپلز پارٹی وسطی پنجاب کے صدر قمر زمان کائرہ فوری ڈائس پر آئے اور کارکنوں کو حوصلہ دینے کے ساتھ انتظامیہ کو

انہیں طبی امداد فراہم کرنے کی ہدایت کی ۔ سابق صدر و پاکستان پیپلز پارٹی پارلیمنٹرینز کے سربراہ آصف علی زرداری کو یوم یکجہتی کشمیر کے موقع پر موچی گیٹ میں منعقدہ جلسہ گاہ آمد کے موقع پر خصوصی ’’پگڑی ‘‘ پہنائی گئی ۔ آصف علی زرداری سخت سکیورٹی میں جلسہ گاہ پہنچے اور ہاتھ ہلا کر کارکنوں کے نعروں کا جواب دیتے رہے ۔ اس موقع پر مقامی رہنماؤں کی طرف سے انہیں خصوصی ’’ پگڑی ‘‘ پہنائی گئی ۔ پاکستان پیپلز پارٹی کے زیر اہتمام یوم یکجہتی کشمیر کے موقع پر موچی گیٹ میں منعقدہ جلسے کے موقع پر سکیورٹی کے انتہائی سخت انتظامات کیے گئے ۔ لاہور پولیس کی جانب سے موچی گیٹ جلسے کے لئے 1500اہلکاروں تعینات کیے گئے جبکہ قریبی عمارتوں کی چھتوں پر سنائپر تعینات رہے ۔ کارکنوں کے داخلے کے لئے تین راستے بنائے گئے جہاں واک تھرو گیٹ نصب تھے اور کارکنوں کو جامع تلاشی کے بعد جلسہ گاہ میں داخلے کی اجازت دی گئی ۔ خواتین کے داخلے کیلئے الگ راستہ مختص کیا گیا تھا ۔جبکہ سابق صدر آصف علی زرداری کی سکیورٹی کے فرائض انکے ذاتی سکیورٹی اہلکاروں نے انجام دیئے اور اسٹیج کو اپنے حصار میں رکھا ۔