راولپنڈی(آئی این پی ) راولپنڈی میں پولیس کے مبینہ تشدد سے نوجوان جاں بحق ہوگیا ، واقعے کے بعد مشتعل افراد نے تھانے کا گھیرا ئو کرلیا ،سی پی او راولپنڈی نے تحقیقات کا حکم دیدیا۔تفصیلات کے مطابق راولپنڈی میں تھانہ گنج منڈی میں پولیس کے مبینہ تشدد سے زیرحراست نوجوان جاں بحق ہوگیا، نوجوان کی ہلاکت پر اہلخانہ مشتعل ہوگئے اور تھانے کے سامنے جلا ئوگھیرا ئو کرکے پتھرائو کیا ،جبکہ بہنیں تھانے کے سامنے زاروقطار روتی رہیں۔
اہل خانہ کا دعوی ہے کہ پولیس نے اتوار کی رات گیارہ بجے نوجوان ریحان کو اٹھا کر لے گئی اور تھانے میں پولیس تشدد سے اس کی موت ہوئی،ریحان کے بھائی نے کہا ہے کہ پولیس کوئی جواب نہیں دے رہی جبکہ ریحان کی بہنیں تھانے کے باہرزارو قطار روتی رہیں۔پولیس کا موقف ہے کہ ملزم پر منشیات فروشی کا الزام تھا ، ملزم ریحان کو درج مقدمے میں گرفتارکیاتھا، ملزم پر تشدد نہیں کیا، دل کی تکلیف پر اسپتال منتقل کیا تھا اور ریحان کی موت طبعی تھی۔سی پی او راولپنڈی نے تحقیقات کا حکم دیتے ہوئے کہا ہے کہ اگر پوسٹمارٹم میں تشدد سے موت ثابت ہوگئی تو اہلکاروں کے خلاف قانون کے مطابق کارروائی کی جائے گی۔
