اسلام آباد(نیوز ڈیسک)وزیراعلیٰ پنجاب میاں شہباز شریف نے کہا ہے کہ دنیا کی کوئی طاقت سعودی عرب اور پاکستان میں اختلافات پیدا نہیں کر سکتی اور دو بھائیوں کا ملنا دشمن کے منہ پر طمانچہ ہے جبکہ پاکستان کی معاشیترقی میں سعودی عرب کا تعاون ناقابل فراموش ہے اور پاکستان پر مشکل وقت میں سعودی عرب کے ساتھ اور سعودی عرب پاکستان کے ساتھ شانہ بشانہ کھڑا ہے۔ امام کعبہ کی آمد پر ہر پاکستانی آنکھیں بچھائے ہوئے ہے اور ان کو دل کی اتھا گہرائیوں سے خوش آمدید کہتے ہیں۔ ان خیالات کا اظہار وزیراعلیٰ پنجاب نے لاہور میں امام کعبہ کے اعزاز میں منعقد ایک تقریب میں شریک شرکاءسے خطاب کرتے ہوئے کیا۔ انہوں نے کہا ہے کہ دشمن جتنی بھی کوشش کر لے سعودی عرب اور پاکستان میں دوریاں پیدا نہیں کر سکتا اور دونوں کے ملنے سے دشمن کو منہ کی کھانی پڑی ہے۔ پاکستان کی عوام ہر مشکل وقت میں سعودی عرب کے ساتھ کھڑی ہے اور ہمیشہ رہے گی اور حرمین شریفین کی حفاطت کے لئے ہر مسلمان جان قربان کرنے کو تیار ہے۔ انہوں نے مزید کہا کہ امن اور جنگ میں سعودی عرب ہمیشہ پاکستان کے ساتھ شانہ بشانہ کھڑا رہا ہے اور پاکستان کی معاشی ترقی میں سعودی عرب کا تعاون ناقابل فراموش ہے۔ پاکستان اور سعودی عرب کے تعلقات کسی سے ڈھکے چھپے نہیں ہیں اور سعودی عرب نے جتنا پاکستان کا ساتھ دیا ہے اس کا الفاظ میں شکریہ ادا نہیں کر سکتے۔ انہوں نے مزید کہا کہ امام کعبہ شیخ خالد الغامدی کو پاکستان آمد پر خوش آمدید کہتے ہیں اور ان کی آمد پر ہر پاکستانی آنکھیں بچھائے ہوئے ہے اور امام کعبہ کی آمد ہمارے لئے باعث خیر و برکت ہے۔