گلگت (مانیٹرنگ ڈیسک) گلگت۔بلتستان کے ضلع غذر کے وادی ہوپر کے قریب مسافر وین کھائی میں جا گری جس کے نتیجے میں 7 افراد ہلاک ہوگئے۔پولیس کے مطابق مسافر وین جس میں ڈرائیور سمیت 7 افراد سوار تھے، غذر ٗچترال روڈ کے ذریعے گاہکوچ کی طرف جا رہی تھی جہاں صبح 9 بجے کے قریب اسے حادثہ پیش آیا۔انہوں نے کہاکہ وین کے کھائی میں گر جانے کے واقعے کی وجہ سے گاڑی میں سوار تمام افراد ہلاک ہوگئے۔وین میں سوار مسافروں کی شناخت یاسر، سجاد، سید امین، صدرالدین، ودود اور زعفران کے نام سے کی گئی۔
ہلاک ہونے والے تمام افراد ہاتون گاؤں کے رہائشی تھے۔ڈرائیور کی سناخت علی مدد کے نام سے کی گئی جو وادی یاسین کے رہائشی تھے۔پولیس کے مطابق وین میں سوار تمام مسافر ایک مذہبی فرقے سے تعلق رکھتے ہیں جو ابتدائی طور پر غذر۔چترال روڈ کے ذریعے وادی ہوپر کی طرف پیدل جارہے تھے۔انہوں نے بتایا کہ راستے میں وین ڈرائیور علی مدد نے انہیں لفٹ دینے کا فیصلہ کیا تھا۔پولیس کا کہنا تھا کہ لاشوں کو کھائی سے نکالا جاچکا ہے اور ان کے لواحقین کو قانونی چارہ جوئی مکمل کرنے کے بعد حوالے کردیا جائے گا۔
