اسلام آباد (این این آئی) وفاقی وزیر دفاعی پیداوار رانا تنویر حسین نے سعودی عرب کو مسلح افواج کی ضروریات پوری کرنے کیلئے پاکستان کی طرف سے دفاعی مصنوعات اور سازو سامان کی فراہمی کی پیشکش کرتے ہوئے کہا ہے کہ پاکستان اسلحہ اور آپٹکس وغیرہ کی تیاری کیلئے بھی سعودی عرب کے ساتھ تعاون کیلئے تیار ہے۔ وفاقی وزیر رانا تنویر حسین نے یہ بات منگل کو سعودی بحریہ کے کمانڈر وائس ایڈمرل فہد بن عبدالستار الفوفیلی سے ملاقا ت کرتے ہوئے کہی ۔وفاقی وزیر نے ملاقات کے دوران
پاکستان کو وقتاً فوقتاً معاونت اور امداد کی فراہمی پر سعودی وفد کا شکریہ ادا کرتے ہوئے سپر مشاک ہوائی جہاز بارے سعوی وزارت دفاع اور پاکستان ایرونارٹیکل کمپلیکس (پی اے سی) میں جاری تعاون کو سراہا۔ ملاقات میں دونوں اطراف نے دفاعی پیداوار خصوصاً بحری جہاز سازی کی صنعت میں باہمی تعاون بڑھانے کی خواہش کا اظہار کیا۔ وفاقی وزیر نے سعودی مسلح افواج کی ضروریات پوری کرنے کیلئے سعودی کمانڈر اور وفد کو پاکستان کی طرف سے دفاعی مصنوعات اور سازو سامان کی فراہمی کی پیشکش کی ۔ انہوں نے کہا کہ ان اشیاء کی فروخت کے بعد سعودی عرب کو مکمل تربیتی پیکیج بھی فراہم کیا جائیگا ۔ انہوں نے پاکستان کی طرف سے سعودی عرب کو دفاعی پیداواری اداروں میں جنگی سازو سامان کی تجرباتی جانچ پڑتال کی بھی پیشکش کرتے ہوئے کہا کہ پاکستان اسلحہ اور آپٹکس وغیرہ کی تیاری کیلئے بھی سعودی عرب کے ساتھ تعاون کیلئے تیار ہے۔ ملاقات کے دوران جنگی جہازوں کی تیاری اور مرمت کی سہولیات کے لئے کراچی شپ یارڈ کے سعودی بحریہ کے ساتھ مشترکہ منصوبوں کے بارے میں بھی تبادلہ خیال کیا گیا۔
