اسلام آباد (مانیٹرنگ ڈیسک) عراق اور شام میں دہشتگرد تنظیم داعش کی سرگرمیاں اور انسانیت سوز مظالم کسی سے ڈھکے چھپے نہیں۔ مذہب کے نام پر قتل و غارت گری کی بدولت جہاں مذہب اسلام کو بدنام کیا گیا وہیں پوری دنیا میں مسلمانوں کیلئے بھی مشکلات پیدا کر دی گئیں۔ داعش اور اس جیسی دیگر دہشتگرد تنظیموں نے انسانیت سوز اور دہشتگردانہ حملوں میں ناپختہ ذہنوں کو استعمال کیا
اور ان میں بچے اور لڑکے شامل تھے۔ ایسا ہی ایک واقعہ موصول میں بھی سامنے آیا جہاں دہشتگردوں نے اپنے مذموم عزائم کی تکمیل کیلئے جنگ کی نظر ہو جانے والے خاندان کے معصوم بچے کو بارودی جیکٹ پہنا کر خودکش حملے کیلئے روانہ کر دیا تھا جسےچیک پوسٹ پر کھڑے بہادر اہلکار نے نہ صرف روکا بلکہ اس معصوم بچے اور دیگر کئی لوگوں کی جان بچا کر زبردست کارنامہ سر انجام دے ڈالا۔ اس سارے واقعہ کی ویڈیو عراقی فوج نے ریلیز کر دی ہے۔ عراق کے شہر موصل میں فوجی اہلکاروں نے ایک خوفزدہ معصوم بچے کو پیٹ پر ہاتھ باندھے مشکوک حالت میں دیکھا تو اپنے پاس بلا لیا۔ اہلکار جان چکے تھے کہ اس معصوم کو دہشتگردوں نے بارود کی جیکٹ میں لپیٹ کر تباہی پھیلانےکیلئے بھیجا ہے۔ ویڈیو میں دیکھا جا سکتا ہے کہ موصل شہر کی ایک چیک پوسٹ کے قریب یہ بچہ اپنے پیٹ پر ہاتھ رکھے خوفزدہ حالت میں کھڑا تھا۔ اس کی مشکوک حالت کو دیکھتے ہوئے ایک اہلکار نے اسے اپنے پاس بلایا اور ہاتھ اوپر کرنے کو کہا۔ بہادر اہلکار کو اندازہ ہو چکا تھا کہ اس بچے کے جسم کے ساتھ بارود بندھا ہو سکتا ہے لہٰذا اس نے انتہائی شفقت کے ساتھ اسے پرسکون رہنے کو کہا اور احتیاط کے ساتھ اس کی شرٹ اتارنا شروع کی۔ اس دورن بچہ خوف سے کانپنے لگا تو اہلکار نے اسے تسلی دی اور ساکت کھڑا رہنے کو کہا۔ بچے کی شرٹ اتری تو اس کے جسم پر
لپٹی پٹی دکھائی دی، جس کے نیچے بارود سے بھری خودکش جیکٹ اس کے ننھے جسم کے ساتھ لپٹی تھی۔ فوجی اہلکار نے احتیاط کے ساتھ ایک تار کو کاٹا اور پھر جیکٹ کو بچے کے جسم سے علیحدٰہ کرنا شروع کیا۔ یہ بے حد خوفزدہ کر دینے والا منظر تھا کیونکہ جیکٹ اتارنے کے دوران پھٹ سکتی تھی۔ خوش قسمتی سے فوجی اہلکار کامیابی سے بارودی جیکٹ بچے کے جسم سے علیحدٰہ کرنے میں کامیاب ہو گیا۔
