لاہور(مانیٹرنگ ڈیسک) سابق وزیر اعلیٰ پنجاب سردار دوست محمد کھوسہ نے کہا ہے کہ موجودہ اور آنے والے سیاسی حالات پر گہری نظر ہے اور مستقبل کے حوالے سے جلد فیصلہ کیا جائے گا ،کسی کو حکمران جماعت میں نقب لگانے کی کیا ضرورت ہے اس کی قیادت کا رویہ ہی کافی ہے ،سردار ذوالفقار علی خان کھوسہ نے ہمیشہ عزت اور اصولوں کیساتھ سیاست کی ہے وہ دونوں پر کبھی سمجھوتہ نہیں کریں گے۔ ایک انٹرویو میں انہوں نے کہا کہ سیاسی رابطے جاری ہیں اور ان میں پیشرفت ہو رہی ہے تاہم جلد مستقبل کے حوالے سے فیصلہ کیا جائے گا۔ انہوں نے کہا
کہ انتخابی سیاست بھرپور طریقے سے کی جائے گی ۔ جنوبی پنجاب میں ترقی کے دعوے کرنے والے عام انتخابات میں ایکسپوز ہو جائیں گے۔ سردار دوست کھوسہ نے کہا کہ جو بھی لوگ ہمارے ساتھ ہیں انہوں نے تمام فیصلوں کا اختیار سردارذوالفقار علی خان کھوسہ کو دے رکھا ہے اور وہ اپنی سیاسی بصیرت کے مطابق یقیناًدرست فیصلہ کریں گے ۔ انہوں نے (ن) لیگ کو توڑنے کی سازش کے سامنے آنے والے بیانات کے سوال کے جواب میں کہا کہ جب آپ کی قیادت کا رویہ ایسا ہو توپھر کیوں کوئی آپ کی جماعت میں نقب لگائے گا آپ خود ہی اس کام کے لئے کافی ہیں۔
