اسلام آباد(مانیٹرنگ ڈیسک)نواز شریف پولیس کے ذریعے بندے قتل کرواتے رہے، میرے دوست کو پولیس کے ذریعے ڈنڈے مروا مروا کر قتل کروایا، کپتان کے ن لیگ کے قائد پر سنگین الزامات، ایک بار پھر مافیا قرار دیدیا۔ تفصیلات کے مطابق منڈی بہائو الدین کے جلسے میں تحریک انصاف کے چیئرمین عمران خان نے ن لیگ کے قائد نواز شریف پر سنگین الزامات عائد
\کرتے ہوئے انہیں قاتل اور مافیا قرار دیا ہے۔ عمران خان نے 1986کا ایک واقعہ جلسہ عام میں سناتے ہوئے کہا کہ ان دنوں میرے نواز شریف سے تعلقات اچھے تھے، میرے ایک دوست میرے پاس آئے اور کہا کہ ہمارا ایک کارکن ہے جسے کا نام پولیس کی لسٹ میں آچکا ہے ، یہ لسٹ وہ ہے جس میں شامل افراد کو پولیس ماورائےعدالت قتل کردیتی ہے۔ آپ نواز شریف سے میری ملاقات کروائیں اس کارکن کو بچانا ہے۔ عمران خان کہتے ہیں کہ میں اپنے دوست کو لے کر نواز شریف کے پاس چلا گیا جہاں میرے دوست نے نواز شریف سے کہا کہ پولیس کی لسٹ میں ہمارے بندے کا نام آگیا ہے آپ پولیس کو روکیں کہ وہ اسے قتل نہ کرے جس پر نواز شریف نے معصوم شکل بناتے ہوئے کہا کہ ایسا نہیں ہو گامیں پولیس کو احکامات جاری کردوں گا۔ عمران خان کہتے ہیں کہ مجھے پہلی بار پتہ چلا کہ پولیس ماورائے عدالت لوگوں کے قتل کیلئے کوئی لسٹ بناتی ہے جس کی منظوری نواز شریف دیتے تھے۔ عمران خان بتاتے ہیں کہ اگلے ہی دن مجھے یہ خبر ملی کہ میرے دوست جس کارکن کو بچانے کیلئے میرے ساتھ نواز شریف کے پاس گئے تھے اس کو پولیس نے ڈنڈے مار مار کر قتل کر دیا ہے۔ عمران خان کا کہنا تھا کہ یہ واقعہ میں نے آج تک کسی کو نہیں بتایا آج بتارہا ہوں کیونکہ آپ کو یہ سمجھانا مقصود ہے کہ ہمارا مقابلہ سیاستدانوں سے
نہیں بلکہ مافیا سے ہے کیونکہ جمہوریت میں ایسا نہیں ہوتا۔
