اسلام آباد(مانیٹرنگ ڈیسک) نجی ٹی وی چینل کے پروگرام میں گفتگو کرتے ہوئے پاکستان تحریک انصاف کے سینئر رہنما نعیم بخاری نے کہا ہے کہ میں اور عمران خان بے تکلف ضرور ہیں لیکن ضرورت سے زیادہ نہیں۔ ایک سوال کے جواب میں انہوں نے کہا کہ میں عمران خان سے ان کی شادی کے بارے میں اس لئے نہیں پوچھ سکتا کہ میرا اور ان کا احترام کا رشتہ ہے، البتہ میں چاہتا ہوں کہ میرے لیڈر کی شادی ہو جائے جو بالکل عین شرعی کام ہے۔ نعیم بخار ی نے گفتگو میں مزاح کا عنصر شامل کرتے ہوئے کہا کہ عمران خان کی شادی ہم

سب کیلئے اس وجہ سے بھی مسئلہ بنی ہوئی ہے کہ ان کی ’’آزادی‘‘ ختم ہو جائے اور وہ ہماری طرح شادی کی مشکلات میں پھنس جائیں۔ ماہر قانون دان نعیم بخاری نے ایک سوال کے جواب میں کہا کہ ایک بار کسی نے جا کر عمران خان کو یہ کہا کہ کیا آپ کو پتہ ہے کہ نعیم بخاری آپ کا بھی بہت مذاق اڑاتا ہے۔ عمران خان نے یہ بات سن کر ہنستے ہوئے جواب دیا کہ ہاں! وہ ایسا ہی ہے۔ نعیم بخاری نے کہا کہ میں کئی مرتبہ کہہ چکا ہوں کہ وہ مائیں ہی نہیں رہیں جو عمران خان جیسا بیٹا اب پیدا کر دیں، یہ ہمارے ملک کی بد قسمتی ہوگی کہ عمران خان کو موقع نہ دیا جائے۔