ریاض (این این آئی)سعودی عرب کے شمال مغربی علاقے میں فوجی مشق کاسح1 کا آغاز ہوا۔ مشق میں سعودی شاہی بری افواج اور پاکستانی فوج شریک ہیں۔مملکت کے شمال مغربی علاقے میں آپریشنز ڈائریکٹر بریگیڈیئر جنرل یوسف خیر اللہ الشہرانی نے واضح کیا کہ کاسح 1 مشق کا مقصد عسکری تجربے اور لڑائی کی مہارت کے تبادلے کے علاوہ یونٹوں کی ہمہ وقت تیاری کی سطح کو بلند کرنا ہے۔بعد ازاں مشق میں پاکستانی فوج کے
کمانڈر بریگیڈیئر جنرل محمد عارف نے اپنے خطاب میں سعودی عرب میں ہونے والی اس مشق میں پاکستانی فوج کی موجودگی پر مسرت کا اظہار کیا۔انہوں نے کہا کہ پاکستان اور اس کی افواج کی مملکت سعودی عرب اور اس کی افواج کے ساتھ طویل تاریخ ہے جو اخوت اور دو طرفہ اعتماد پر مبنی ہے۔انہوں نے واضح کیا کہ کاسح 1 فوجی مشق کا مقصد لڑائی کے دوران جدت طرازی کے حامل آلات کے خطرات سے نمٹنے کی صلاحیت حاصل کرنا ہے اور پاکستانی فوج اس نوعیت کے خطرات پر قابو پانے میں مہارت رکھتی ہے۔
