کراچی (نیوز ڈیسک) شہرقائد میں دیرپاامن قائم نہ رہ سکا اور اب کی بارالفلاح کے علاقے میں سینئرسول جج سکندر حمید کو نشانہ بنایاگیا تاہم وہ خوش قسمتی سے محفوظ رہے اور محافظوں کی جوابی فائرنگ سے ایک ملزم زخمی ہوگیا۔تفصیلات کے مطابق حسب معمول سینئر سول جج سکندر حمید اپنی رہائش گاہ سے ملیرکورٹ آرہے تھے کہ کچہری کے قریب تین نامعلوم افراد نے اْن کی گاڑی پر فائرنگ کردی۔سیکیورٹی ذرائع کے مطابق محافظوں کی جوابی کارروائی میں ایک ملزم زخمی جبکہ دوفرار ہونے میں کامیاب ہوگئے ،زخمی ہونیوالے ملزم کو گرفتار کرکے تشویشناک حالت میں ہسپتال منتقل کردیاگیاجبکہ ایس ایس پی کورنگی جنید شیخ کا کہناہے کہ ابتدائی طورپر واقعہ سٹریٹ کرائم کالگتاہے ، ملزم زخمی حالت میں فرارہوگیاہے۔
اے آروائے نیوز کے مطابق پولیس مقابلے کے بعد زخمی ملزم کو حراست میں لے لیاگیا۔ سول جج سکندرحمید نے بتایاکہ دہشتگردوں کی فائرنگ سے اْن کی گاڑی کا ٹائر پھٹ گیا ،و ہ نئی زندگی ملنے پر خدا کا شکراداکرتے ہیں۔بتایاگیاہے کہ حملے کے بعد ملیر کورٹ کے جج صاحبان سیشن عدالت میں جمع ہوگئے ہیں جبکہ وکلاء4 نے احتجاجاً ہڑتال کردی۔ ابتدائی طورپر پکڑے گئے ملزم کی شناخت نہیں ہوسکی۔